Vanylven kommune, Møre og Romsdal

Vanylven kommune, 385 km², ligg i Møre og Romsdal, har om lag 3500 innbyggjarar og grensar i nord til Sande og Herøy, i aust til Volda, og til tre kommunar i Sogn og Fjordane, Eid og Vågsøy i sør og Selje i vest.

I 1918 vart Syvde skild ut som eigen kommune, men i 1964 vart Syvde og delar av Rovde slått saman med Vanylven. I 2002 vart området sør for Hallefjorden overført frå Sande.

Vanylven ligg i eit fjordlandskap heilt sørvest i fylket. Det meste av busetnaden ligg ved fjorden, men der er òg spreidd busetnad i nokre dalføre. Dalføra er ofte tronge, gjerne med svært bratte dalsider. Kommunen har tre mindre tettstader, Åheim, Myklebost og administrasjonssenteret Fiskå. Det høgaste punktet i kommunen er Blæja, 1142 moh.

Den største verksemda i kommunen er North Cape Minerals. Mineralet olivin vert mykje brukt i råjernindustrien, og det meste av produksjonen vert eksportert. Her er òg trevare- og betongindustri og skipsverft. Mange er sysselsette i jordbruket, men oftast i kombinasjon med anna arbeid. 

På Åheim ligg mellomalderkyrkja St. Jetmund, ei steinkyrkje frå rundt 1150.
 
Synste Møre er lokalavis for Vanylven, og det første nummeret kom i 1970. Avisa skifta i 1987 namn til VestAvisa, men tok tilbake det gamle namnet i 2000. Avisa kjem ut ein gong kvar veke, har hovudkontor i Fiskå og er redigert på nynorsk.

I Vanylven tok dei første skulane i bruk nynorsk som opplæringsspråk alt i 1899. Nynorsk liturgi vart røysta inn i 1917 (Rovde), og nynorsk vart tenestespråk i kommunen i 1922 (Rovde). Kommunen har seks grunnskular, og skuleåret 2008/09 har 99,6 % av elevane ved desse skulane nynorsk.