VIL DU SKRIVE FOR ALLKUNNE?Allkunne treng forfattarar som kan skrive om alle emne. Artiklane i Allkunne er signerte, og vert honorerte etter vanlege leksikonsatsar. Det er utarbeidd eiga skriverettleiing, og alle tekstar vert vurderte av ein redaksjon før publisering. Så langt har vi rundt 90 forfattarar, men vi vil gjerne ha fleire! Kontakt dagleg leiar for meir informasjon, allkunne@allkunne.no.  | Edvard OsEdvard Samuel Os, offiser og norskdomsmann. Han var den mest militante organisatoren i norskdomsrørsla og blei sjølv kontant avsett. Os var fødd på Nordfjordeid 20. april 1885 og døydde 9. januar 1970. Etter eksamen frå Krigsskulen i 1907 og vidare militær utdanning blei han offiser i Forsvaret. Han var sjef for Varanger bataljon 1933–40 og forsvarssjef i Aust-Finnmark 1939–40.
I norskdomsrørsla var han i mellomkrigstida den fremste av alle organisasjonsfolk. Som dagleg leiar i både Noregs Mållag og Noregs Ungdomslag 1913–27 gjorde han desse samskipnadene til moderne organisasjonar. Etter ein langvarig konflikt om organisasjonsmetodar blei han avsett frå stillinga si i 1927. Seinare var Os driftsstyrar i Noregs Boklag 1927–32 og konsulent for målbruk i Forsvaret og i statsforvaltninga.
Han redigerte mange lagsblad, skreiv handbøker i lagsarbeid og amatørteater, seinare også ordbøker og bygdebøker.
Os var æresmedlem i Studentmållaget i Oslo frå 1950.
Kjelder
Olaf Almenningen o.fl.: Målreising i 75 år. Oslo 1981
Ottar Grepstad: Viljen til språk. Ei nynorsk kulturhistorie. Oslo 2006
SKRIV UT    |