VIL DU SKRIVE FOR ALLKUNNE?Allkunne treng forfattarar som kan skrive om alle emne. Artiklane i Allkunne er signerte, og vert honorerte etter vanlege leksikonsatsar. Det er utarbeidd eiga skriverettleiing, og alle tekstar vert vurderte av ein redaksjon før publisering. Så langt har vi rundt 90 forfattarar, men vi vil gjerne ha fleire! Kontakt dagleg leiar for meir informasjon, allkunne@allkunne.no.  | Julius FureJulius Andreas Fure, høgrepolitikar frå Selje som sette sterke spor etter seg, ikkje minst i det fylkespolitiske arbeidet i Sogn og Fjordane. Fure var fødd 19. desember 1931 i Selje og døydde same staden 18. mars 2006. Han var busett på Leikanger i Selje, der han dreiv som kjøpmann. Han engasjerte seg politisk i Høgre og var ordførar i Selje i 1968–71 og i 1976–82. I 1976 var han drivkraft for, og kom inn på fylkestinget i Sogn og Fjordane på, ei liste som stod for desentralisert utbygging i fylket, og som tufta seg på den gamle sjukehusstriden. I 1980 gjekk han tilbake til Høgre, og han var medlem av fylkestinget fram til 1995, som fylkesvaraordførar i 1984–87 og fylkesordførar i 1988–91.
Fure markerte seg på mange ulike politiske område, ikkje minst når det galdt samferdsel og energiforsyning. I tida som fylkesordførar engasjerte han seg spesielt for å få sett i gang det såkalla «Sogn og Fjordane-prosjektet», som skulle betre folkehelsa gjennom ei styrking av det sjukdomsførebyggjande arbeidet. Prosjektet vekte merksemd både nasjonalt og internasjonalt.
Kjelder
«70 år i dag: Handelsmann Julius Fure», Aftenposten 19.12.2001
Peikar
«Tidlegare fylkesordførar Julius Fure er død», nettsidene til Sogn og Fjordane fylkeskommune
SKRIV UT    |