Liv Signe Navarsete

Navarsete er fødd 23. oktober 1958 i Sogndal. Dei seinare åra har ho budd i Lærdal. Ho har utdanning som cand.mag. i økonomi, administrasjon og IKT ved Høgskulen i Sogn og Fjordane 1999. Yrket sitt har ho hatt innan landbruket som sjølvstendig næringsdrivande sidan 1977, frå 1987 til 1996 som salskonsulent for Sogn og Fjordane meieri.

 

Forutan å ha sete i kommunestyra både i Sogndal og Lærdal har Navarsete vore medlem av fylkestinget i Sogn og Fjordane 1995–1999 og fylkesutvalet 1999–2005. I 2005 vart ho vald inn som stortingsrepresentant frå Sogn og Fjordane for SP (vara 2001–05), men ho gjekk snart over i jobben som statsråd. Navarsete var leiar i Sogn og Fjordane SP 1998–2004, og vart i 2001 2. nestleiar i SP sentralt. Ho har elles hatt ei rekkje offentlege og private verv, mellom anna som styremedlem i Gjensidige Forsikring og styreleiar i Vestlandsforsking. I 2007 fekk ho Storegutprisen for god og levande nynorskbruk.  

 

Som samferdsleminister har Navarsete blitt stilt overfor store utfordringar. I hennar periode har klimaendringane sett sitt preg på det offentlege ordskiftet, og miljørørsla har kravd mindre utslepp frå transportsektoren. Svaret på dette har blant anna vore auka statlege investeringar i jernbanenettet. På den andre sida har mange hatt store forventningar til at Navarsete skulle få til løysingar på uløyste vegprosjekt, ikkje minst i distrikta. Ho har likevel avvist offentleg-privat samarbeid (OPS) som finansieringsmåte i vegsektoren.

 

Våren 2008 markerte Navarsete seg som ein verdikonservativt medlem av regjeringa. Saman med Magnhild Meltveit Kleppa tok ho dissens på forslaget i den nye ekteskapslova om å gi lesbiske tilgjenge til assistert befruktning. Dette var den første dissensen i denne regjeringa.