VIL DU SKRIVE FOR ALLKUNNE?Allkunne er eit digitalt nynorsk leksikon. Mange forfattarar produserer artiklar for Allkunne, men vi treng fleire! Artiklane i Allkunne blir honorerte etter vanlege leksikonsatsar.Vi er òg på jakt etter fagkonsulentar med formell kompetanse innan fagfelta biologi, kjemi, meteorologi og offentleg administrasjon. Andre fagfelt er òg aktuelle, ta kontakt om du er interessert. Fagkonsulentar blir honorert etter standard satsar. For meir informasjon, kontakt dagleg leiar på allkunne@allkunne.no   | Trygve FosstveitTrygve Fosstveit, kringkastingsmann og folkeopplysningsmann. Han arbeidde i over 30 år i undervisningsradioen i NRK og var drivkrafta bak radiokurs i nordsamisk. Fosstveit var fødd 22. april 1919 i Drangedal og døydde i Sauherad 23. november 2004. Han gjekk på Vestmar folkehøgskule 1937–38, tok examen artium ved Hornnes landsgymnas i 1944 og lærareksamen ved Oslo lærerskole i 1949. I tida 1944–47 var han lærar ved Drangedal private realskule. Etter lærareksamen arbeidde han ved Bekkelaget skole før han byrja i NRK i 1953.
I 33 år var han i skulekringkastinga, 23 år som leiar. I tillegg laga han diktarportrett, folkemusikksendingar og andre kulturprogram. Han var oppteken av situasjonen for samisk og kvensk og fekk i 1983, i samarbeid med svensk og finsk radio, sett i gang kurs i nordsamisk. Undervisninga var kombinert med brevkurs.
Saman med Knut Gjerden gav han ut boka Folk og fjell – daglegliv på fjellviddene i Hardanger, Telemark og Setesdal (1989). Han skreiv ei rad artiklar om lokalhistorie og kulturhistorie, mellom anna i Jol i Telemark. Fosstveit sat i mange år i styret for Dag og Tid og var aktiv i målrørsla og folkehøgskulerørsla.
Kjelder
Olaf Almenningen ofl. (red.): Målreising i 75 år. Noreg Mållag 1906–1981. Oslo 1981
Kirsti Asskildt: «Populær leder sier farvel», Aftenposten 21.10.1986
Karl Bakke (red.): Norske skolefolk. Stavanger 1952 Trygve Fosstveit: «Skoleradio – Skolefjernsyn», i Skolens årbok 1979. Oslo 1979 Jon Grepstad: «Skulekringkastinga – språkundervisning med spenning og engasjement», i Språk og språkundervisning, 1–2, 1976
Sigmund Groven: «Trygve Fosstveit». Minneord, Aftenposten 20.12.2004
Inga Guttorm ofl.: Davvin 1. Nordsamisk for begynnere. Folkets Brevskole og Norsk Korrespondanseskole 1983 Eilert Kvernes: «Trygve Fosstveit til minne», Varden 11.12.2004 Tormod Strømme og Marit Aakre Tennø (red.): Med hjartet på rette staden. Kringkastingsringen 50 år 1955–2005. Oslo 2005
SKRIV UT   |