Faktaboks

Linda Cathrine Hofstad Helleland
Fødd
26. august 1977, Klæbu, Trøndelag
Linda Cathrine Hofstad Helleland
Linda Cathrine Hofstad Helleland
Av /NTB scanpix.

Linda Cathrine Hofstad Helleland er ein norsk politikar for Høgre, stortingsrepresentant frå Sør-Trøndelag og tidlegare statsråd i regjeringa Solberg i periodane 2015–2019 og 2020–2021. Frå 2015 til 2018 var Hofstad Helleland kulturminister, i 2018–2019 var ho barne- og likestillingsminister og i 2020–2021 var ho distrikts- og digitaliseringsminister i Kommunal- og moderniseringsdepartementet.

Bakgrunn

Linda Cathrine Hofstad Helleland er fødd i Klæbu (no Trondheim) i Sør-Trøndelag (no Trøndelag). Ho gjekk på Adolf Øiens videregående skole i 1993–1997 og var utvekslingselev ved Walled Lake Central High School i USA i 1994–1995. Ho studerte medievitskap, statsvitskap og sosiologi ved NTNU i 1998–2000, statsvitskap ved Høgskolen i Molde i 2005, leiing og coaching og prosjektleiing ved BI i 2006–2007.

Politisk karriere

Hofstad Helleland var medlem av arbeidsutvalet i Unge Høgre i Klæbu i 1995–1998 og Unge Høgre i Sør-Trøndelag i 1996–1997. I 1997–1998 var ho ungdomssekretær og i 1999–2000 leiar i Sør-Trøndelag Unge Høgre. I 2000–2001 var ho organisasjonssekretær i Unge Høgres Landsforbund.

Ho var medlem av kommunestyret i Trondheim i 1999–2001, 1. nestleiar i Sør-Trøndelag Høgre i 2005–2008, leiar i 2008–2009 og igjen 1. nestleiar frå 2012. Sidan 2004 har ho vore medlem av arbeidsutvalet i Høgre og kvinnepolitisk leiar, og ho har vore medlem av sentralstyret i partiet.

På Stortinget var ho vararepresentant frå 2001 til 2009, men møtte fast for Børge Brende i 2001–2005. I 2007–2008 var Hofstad Helleland informasjons- og presserådgivar for Høgre og for stortingsgruppa til Høgre. Ho har vore vald inn som stortingsrepresentant for Høgre frå Sør-Trøndelag sidan 2009. Ho var medlem av justiskomiteen i 2001–2005, så familie- og kulturkomiteen i 2009–2013 og deretter leiar av transport- og kommunikasjonskomiteen i 2013–2015. Ho er sidan 2019 medlem av næringskomiteen.

Hofstad Helleland var utnemnd til kulturminister i regjeringa Solberg i 2015–2018, var barne- og likestillingsminister 2018–2019, og var frå januar 2020 til oktober 2021 distrikts- og digitaliseringsminister.

Andre verv

Ho var medlem av forstandarskapet for Klæbu Sparebank i 2004–2007, og ho har vore varamedlem i kontaktutvalet mellom innvandrarbefolkninga og styresmaktene sidan 2006.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg