Faktaboks

Anders Lothe

Anders Matias Abrahamsen Lothe, Anders A. Lothe

Fødd
23. desember 1875, Lote i Gloppen, Vestland
Død
23. januar 1962, Florø i Kinn, Vestland

Anders Lothe var lærar, målmann og politikar. Han gjekk i brodden for mange målpolitiske og kulturelle nytiltak i Sogn og Fjordane.

Anders Lothe var fødd på Lote i Gloppen. Han var elev ved amtsskulen i Florø og tok seinare utdanning ved Seljord lærarskule (1896) og ved Tanks skule i Bergen (1901). I 1896 starta han den lange yrkeskarrieren sin som lærar i folkeskulen, først i Gloppen og seinare i Kinn og Sparbu, før han kom til Florø i 1915. Der vart han verande til han gjekk av for aldersgrensa i 1945.

Han var den første som skreiv norskstilen sin på landsmål då han tok mellomskuleeksamen i 1901. Lothe var seinare mangeårig formann i Firda Mållag og ein av pådrivarane for å skipe Nordfjord Sogelag og Firda Gymnas på Sandane.

Lothe redigerte avisa Firda Folkeblad 1911–1916, med klassiske venstresaker som målreising og fråhald som fanesaker. I 1920-åra gjekk han inn i Arbeidarpartiet og vart vald inn som partiet sin første stortingsrepresentant frå Sogn og Fjordane. Han sat på Stortinget i 1928–1930 og frå 1933 til 1940, først som medlem av universitets- og fagskulenemnda, seinare av veg- og jernbanenemnda.

Lothe skreiv fleire lokal- og regionalhistoriske bokverk. Det viktigaste er Målreisingssoga i Sogn og Fjordane.

Les meir i Store norske leksikon

Eksterne lenker

Litteratur

Faktaboks

Anders Lothe
Historisk befolkingsregister-ID
pf01036709000779

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg