Faktaboks

Jacob Aaland
Fødd
27. april 1865, Randabygda i Stryn, Vestland
Død
18. oktober 1950, Sandane i Gloppen, Vestland
Verke
Lærar og lokalhistorikar
Familie

Foreldre: Husmann Anders Persson Hamar (1826–90) og Brita Jensdotter Åland (1827–66).

Gift 1896 med Anna Kristine Andersen (12.10.1867–6.1.1958), dotter til politibetjent Ingebrigt Andersen (f. 1849) og Oline Persdotter (f. 1850).

Jacob Aaland
Jacob Aaland
Av /𝒲.

Jacob Aaland var historikar, lærar og forfattar. Gjennom heile livet dreiv han lokalhistorisk gransking, særleg i Nordfjorddistriktet.

Jacob Aaland var fødd i Randabygda i Stryn. Han var elev ved amtsskulen i Gloppen 1881–1882 og tok eksamen ved Stord lærarskule i 1884. Seinare gjekk han mellom anna på Den gymnastiske Centralskole i Kristiania. Aaland arbeidde som lærar i folkeskulen først i Sigdal, Brevik og Kragerø fram til 1892, deretter ved ulike skular i Bergen fram til 1932. I 1917–1919 redigerte han avisa Fjordenes BladNordfjordeid.

Den store interessa til Aaland var lokalhistorie, og han busette seg i Bergen for å kunne vere nær kjeldematerialet i Stiftsarkivet (no Statsarkivet). Han var med på å starte Nordfjord historielag i 1907 og skreiv ei rekkje lokalhistoriske bøker og artiklar. Frå 1909 til 1943 arbeidde han med hovudverket sitt, Nordfjord fraa gamle dagar til no (1909–1943), ei bygdebok i fem bind om bygdene frå Stryn i aust til Selje og Vågsøy i vest, som på folkemunne berre vert kalla «Aalandsboka». Frå 1914 til 1919 fekk han statsstipend for å halde på med dette arbeidet. Aaland refererte først og fremst historiske fakta, han var mindre oppteken av å skrive samanfattande verk med eigne tolkingar.

Aaland var òg politisk engasjert og aktiv i organisasjonslivet. Ei tid var han representant for Venstre i bystyret i Bergen, og han var leiar mellom anna for Bergens lærersamfund.

Les meir i Store norske leksikon

Eksterne lenker

Faktaboks

Jacob Aaland
Historisk befolkingsregister-ID
pf01037335047868

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg