Faktaboks

Ananias Brune

Ananias Johannes Brune

Fødd
20. november 1853, Dalsbygda i Volda, Møre og Romsdal
Død
23. desember 1942, Hammerfest, Troms og Finnmark
Ananias Brune
Av /Øst-Finmarkens Folkeblad, 1917.

Ananias Brune var ein norsk lærar, målmann, ordførar i Vadsø og læstadiansk forkynnar. Saman med Karl Akre stod han i 1875 for det nordlegaste forsøket på etablere ei avis på landsmål.

Lærar og ordførar

Han tok lærareksamen ved Tromsø Seminar i 1874. Etter korte opphald i Helgøy i 1874 og i Skallelv og Salttjern distrikt i Nord-Varanger var han frå 1883 til 1920 lærar i folkeskulen i Vadsø. Deretter flytta han til Hammerfest og budde der som pensjonist.

Brune sat i bystyret i Vadsø i perioden 1903–1920, var i fleire år medlem av formannsskapet og var ordførar i 1913. Han var medlem av fattigstyret i tolv år, sju år som formann, var lærarrepresentant i skulestyret i mange år og var forlikskommissær og overformyndar. I feriane var han i mange år telegrafist og oppsynsmann under Finnmark-fisket.

Læstadianar

Brune var læstadianar og verka som forkynnar både i Vadsø og Hammerfest. I 1885 vart han suspendert frå lærarstillinga i Vadsø på grunn av mindre avvik frå den augsburgske truvedkjenninga. Han vart frikjend i prosteretten og gjekk tilbake i stillinga i 1889.

Han omsette preiker av Læstadius frå kvensk til norsk, mellom anna Læstadius' kyrkjepostill. I 1927 gav han ut Nogen ord om Læstadius og Læstadianismen, og i 1830–1837 redigerte han det læstadianske månadsbladet Sions blad.

Landsmål

I juli 1875 gav han saman med Karl E. Akre ut landsmålbladet Finnmarkingen, men bladet kom berre med to nummer. Det var det nordlegaste blad-framstøtet på landsmål.

Les meir i Store norske leksikon

Litteratur

  • A. Brune: «Bidrag til Finnmarkens kirkehistorie, VI. Den levende kristendom i Vadsø. Den såkalte læstadianske menighet i Vadsø», Norvegia sacra 1934. Oslo 1934. Les boka her.
  • Arne Espeland (red.): Norske skulefolk. Stavanger 1934. Les boka her.
  • Johs. Myklebust: «Lærer A. Brune», Norsk Skoletidende nr. 32, 1920. Les bladet her.
  • Kaare Berg-Hansen. «Ananias Brune og den norske 'Læstadius'». Vår kirke i nord : årbok for Hålogaland. 1954. Les boka her.

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg