Faktaboks

Ivar Digernes

Ivar Arnstein Knutson Digernes

Fødd
29. april 1904, Ørsta, Møre og Romsdal
Død
8. februar 1958, Oslo

Ivar Digernes var ein norsk kommunistisk kulturskribent og oversettar, som spela ei viktig rolle som kulturformidlar mellom Sovjetunionen og Noreg.

Bakgrunn

Han tok examen artium i 1922 ved Volda landsgymnas og flytta året etter til Oslo. Her arbeidde han i arbeidarpressa og blei aktiv i Mot Dag-rørsla.

Omsetjing

Digernes budde i Moskva i perioden 1927–1935. Her gifta han seg med Tatjana Nesterova i 1930, som han fekk tre born med. Under dette opphaldet arbeidde han for eit sovjetisk forlag og omsette ei rekkje russiske bøker til norsk, hovudsakleg til bokmål, mellom anna av Lenin, Sjolokhov, Gorkij, Tolstoj og Dostojevskij. Særleg omsetjinga hans av Forbrytelse og straff er gitt ut fleire gonger.

Han blir av mange omtala som den «ideologiske fødselshjelpar» bak Nordahl Griegs politiske utvikling i 1930-åra. Digernes var redaksjonssekretær i Griegs tidsskrift Veien frem i åra 1936–1937.

Digernes fullførte cand.mag.-graden ved Universitetet i Oslo i 1938, med faga engelsk, tysk og historie. Han arbeidde etter dette som lærar i Narvik. Under andre verdskrigen budde Digernes og familien i Sverige. Her utga han pamfletten Vidkun Quisling – et varnande exempel under psevdonymet Halvard Gråtopp.

Etter krigen arbeidde han mellom anna som utanriks- og kulturredaktør i NKP-avisa Friheten og som tolk ved den sovjetiske ambassaden i Oslo. Mot slutten av livet skreiv han for tidsskriftet Fossegrimen, som Torolv Solheim hadde starta i 1954.

Les meir i Store norske leksikon

Litteratur

  • Jens Kåre Engeset: «Ivar Digernes (1904–1958). Ein radikal kulturformidlar», i Vent vidar seg Hovdevatnet. Kulturhistoriske artiklar. Hovdebygda 2005. Les boka her.
  • Martin Nag: Ivar Digernes. En kulturformidler mellom Sovjetunionen og Norge. Oslo 1985
  • Torolv Solheim. «Ivar Digernes om Nordahl Grieg». Fossegrimen, nr 1, 1958. Intervju. Les bladet her.
  • Torolv Solheim. «Ivar Digernes». Fossegrimen, nr 3/4, 1958. Les bladet her.
  • Torolv Solheim. «Ivar Digernes til minne». Arbeiderbladet, 11. februar 1958. Les avisa her.

Faktaboks

Ivar Digernes
Historisk befolkingsregister-ID
pf01063298045484

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg