Tore André Flo er fødd 15. juni 1973 i Stryn i Sogn og Fjordane. Han kjem frå ein aktiv fotballfamilie. Han er busett i London.

Etter å ha spela fotball for heimeklubben Stryn i ungdomsåra gjekk Flo til Sogndal i 1993. Åra i Sogndal (1993–94), Tromsø (1995) og Brann (1995–96) gjorde han attraktiv for dei store fotballklubbane i Europa. Som klubbspelar var nok perioden i Chelsea (1996–2000) den mest suksessfulle for Flo. I London-klubben var han med på å vinne den europeiske cupvinnarcupen i 1998 og den engelske FA-cupen i 2000.

Prestasjonane i Chelsea gav Flo ein høg marknadsverdi. I 2000 vart han seld til skotske Glasgow Rangers for heile 161 millionar kroner. Han spela her til 2002, og høgdepunktet var det skotske ligacupgullet i 2002. Flo spela også for Sunderland (2002–03), italienske AC Siena (2003–05), Vålerenga (2006) og Leeds United (2007–08), før tanken var å avslutte karrieren i londonklubben MK Dons (2008–09).

I 2011–12 spela han igjen for Sogndal, og sidan 2013 har han jobba i den engelske fotballklubben Chelsea.

Flo skåra 23 mål i løpet av 76 A-landskampar for Noreg (1995–2004). Han har også 28 U21-kampar, og her skåra han 15 mål. Angrepsspelaren fekk med seg VM for Noreg i 1998 og EM i 2000. Han skåra mange viktige mål for landslaget, mellom anna mot Brasil i VM i Frankrike i 1998.

Flo har brukt fotballkarrieren til å snakke om dialektbruk og nynorsk i høve til identitet. Han har mellom anna stilt opp for Norsk Målungdom sin kampanje «Hald på nynorsken» (2004).

Tore André Flo legger opp, fotballen.eu, http://www.fotballen.eu/artikler/flo.html [lesedato 10.2.2012]

Fotballside om Tore André Flo, Sogn og Fjordane Fylkesleksikon, nrk.no, http://www.nrk.no/sf/leksikon/index.php/Tore_Andr%C3%A9_Flo [lesedato 10.2.2012]
Flo blir trenar i Chelsea, nrk.no
http://www.nrk.no/sognogfjordane/flo-blir-trenar-i-chelsea-1.11113426  [lesedato 19.8.2013]