Hopp til innhold
X
Innhald

Olav Garvik

Olav Johannes Garvik, mangeårig journalist i Bergens Tidende og forfattar av politiske biografiar.

Garvik er fødd 21. mars 1944 i Ogna i Rogaland, no Hå kommune. Han tok examen artium ved Rogaland off. landsgymnas i 1963 og vart cand.mag. ved Universitetet i Bergen i 1969 med faga norsk, historie og samfunnskunnskap.
Han var journalist i Bergens Tidende 1969–78, sjefredaktør i Porsgrunns Dagblad i 1979, så igjen journalist i Bergens Tidene 1980–87, redaksjonssekretær, leiar av politisk avdeling og leiarskribent 1987–95 og journalist 1995–2009. I Bergens Tidende skreiv han både bokmål og nynorsk. Etter at han slutta i avisa, har han vore frilansjournalist.
Garvik var formann i Studentvenstrelaget i Bergen i 1966, formann i Norges Liberale Studentforbund 1967–68, medlem av landsstyret i Norges Unge Venstre 1967–68 og formann i Studentsamfunnet i Bergen i 1968.
Han har skrive mellom anna Da Venstre sprakk (1982), Kristelig Folkeparti mellom tro og makt (1983),  Henrik Ameln. Mennesket bak replikkene (1992), Wollert Konow. Statsminister og stril (2001), Bent Røiseland. Statsministeren vi ikke fikk (2003 saman med Marianna Røiseland og JensVetland) og Sponheim uautorisert (2010 saman med Olav Kobbeltveit).
I 2011 vart han tildelt Bergen Journalistlags heiderspris.
Kjelder
Kjersti Mjør: «Hyllest til erkejournalisten», Bergens Tidende 20.11.2011
NTB: «Olav Garvik 60 år», 27.2.2004
Nils E. Øy (red.): Pressefolk 1997. Institutt for Journalistikk 1998

Først publisert: 12.04.2012
Sist oppdatert: 12.04.2012