Mattis Hætta var ein samisk songar, joikar og skodespelar. Han representerte Noreg under den europeiske musikktevlinga Melodi Grand Prix i Haag i 1980, saman med Sverre Kjelsberg frå bandet Pussycats.
Kjelsberg skreiv songen «Sámiid Ædnan» saman med Ragnar Olsen til teaterframsyninga Nullpunktet, om Alta-saka, for Hålogaland Teater, der begge var tilsette. Mattis Hætta var då ein ung joikar, og heimbygda hans, Masi i Kautokeino, var ei av bygdene som var foreslått lagd under vatn i utbygginga av Alta/Kautokeino-vassdraget. Hætta hadde sjølv vore med i aksjonane utanfor Stortinget sommaren 1979, som songteksten fortel om. Alta-utbygginga skapte merksemd for samesaka, og songen sette samefolket sine rettar på agendaen også utanfor Noreg. Popsongen vart slik ein del av protestaksjonane mot utbygging av Alta-elva, ei sak som for mange vart sjølve symbolet på den norske statens overgrep mot samane som urfolk.
Hætta var utdanna som lærer ved lærarhøgskulen i Alta. Som skodespelar har han arbeidd mellom anna med Beaivváš Sámi Našunálateáhter og i fjernsynsserien Hjerterått (2013). Hætta har og vore engasjert ved Lule Stassteater i Luleå innen joik og pantomime.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.