Faktaboks

Per Halse
Fødd
24. januar 1957, Ørsta, Møre og Romsdal

Per Halse er teolog og professor ved Høgskulen i Volda. Han har arbeidd mykje med språkhistorie innanfor den norske kyrkja.

Per Halse er fødd i ØrstaSunnmøre. Etter å ha fullført Volda gymnas i 1976 gjekk han eit år på Øytun Folkehøgskule i Alta. Deretter studerte han ved Menighetsfakultetet i Oslo, der han vart cand.theol. i 1984. I 1990 tok han historie grunnfag ved Universitetet i Tromsø (no UiT Norges arktiske universitet), og i 1993 grunnfag i pedagogikk ved Volda lærarhøgskule (no Høgskulen i Volda). I 2009 vart han ph.d. ved det teologiske fakultetet ved Universitetet i Oslo, med avhandlinga Gudsord og folkemål. Framveksten av nynorsk kyrkjespråk 1859–1908.

Halse var kateket i Karlsøy 1985–1987 og vikarierande sokneprest same staden 1987 og 1989–1990. Han var vikarprest i Søre Sunnmøre prosti 1990–1991 og arbeidde samstundes ved Volda vidaregåande skule. I 1991 vart han tilsett som høgskulelektor ved Volda lærarhøgskule. Denne skulen vart frå 1994 ein del av Høgskulen i Volda, der Halse framleis er tilsett. Frå 1999 var han førstelektor, frå 2009 førsteamanuensis og frå 2018 professor. Frå august 2011 til 2015 var han rektor ved høgskulen.

Han sat i styret ved Høgskulen i Volda i perioden 2008–2015 og i styret for Norske Kyrkjeakademi 2008–2012. Sidan 2014 har han vore rådsmedlem i Nynorsk kultursentrum, frå 2018 som rådsordførar.

Dei faglege tyngdepunkta til Halse er norsk kyrkjehistorie og Det nye testamentet. Han sameinar desse felta i avhandlinga si, der han ser på arbeidet med den første heilnorske bibelomsetjinga. Halse har skrive fleire lærebøker, mellom anna Gudsord og menneskeord, ei innføring i bibelkunnskap for bibelstudiet i allmennlærarutdanninga. I samband med 100-årsjubileet for Fyrebilsbibelen gav han i 2021 ut «Den fyrste bibelen paa norsk». Historia om Fyrebilsbibelen saman med Anders Aschim.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg