Tone Hulbækmo er fødd 27. september 1957 i Tolga i Østerdalen. Faren, Alf Hulbækmo (1903–87), var organist og ein viktig tradisjonsformidlar for henne frå barndomen av. Ho blei vidare tidleg medlem av ensemblet til fløytespelaren Egil Storbekken, Tolgatusseladdene. I tillegg til å ha song som hovudinstrument spelar ho piano, orgel og harpe.

 

Hulbækmo er ein akademisk utdanna tradisjonsformidlar. Ho var elev ved Toneheim Folkehøgskole i 1976–77 og student ved Universitetet i Oslo frå 1977, der ho tok grunnfag i sosialantropologi og mellomfag i musikk. Ho er gift med musikaren Hans Fredrik Jacobsen, som har vore ein sentral bidragsytar og samarbeidspartnar på dei fleste plate- og konsertprosjekta hennar. Dei er òg begge medlemmer av mellomalderensemblet Kalenda Maya. Sidan 1989 har dei vore busette i Tolga.

 

I 1983 gav Hulbækmo ut den første plata si, Kåmmå no, som blei heidra med Spelemannsprisen. På denne utgivinga står tradisjonsmusikk frå østerdalsdistriktet sentralt. Den neste soloplata hennar, Svevende jord (1986), inneheld gamle folketonar, bånsullar og kulokkar frå eit større geografisk område. Dei nyskrivne arrangementa er dels for tradisjonelle instrument som harpe, seljefløyte og fele, dels for synthesizer og perkusjonsinstrument som marimba. Til tittelsporet på plata regisserte Sverre Pedersen ein musikkvideo, den første nokon gong laga til norsk folkemusikk, og produksjonen blei kåra til beste norske musikkvideo det året. Same året turnerte ho i USA i seks veker og heldt 20 konsertar.

 

I 1988 gav Hulbækmo og Jacobsen ut barneplata Langt nord i skogen. Også her finn vi den karakteristiske kombinasjonen av vokalt tradisjonsmateriale (norske barnerim og -regler) og nyskrivne arrangement for moderne instrument. Mellom anna er den brasilianske perkusjonisten Celio de Carvalho sentral i lydbiletet, og også denne plata blei heidra med Spelemannsprisen. Plata Konkylie (1995) består av 16 tonesetjingar til dikt av Halldis Moren Vesaas, mens Kyrja (dialekt for «kyrie») frå 1999 består av eldre religiøst materiale frå Østerdalen.

 

Saman med Jacobsen har ho komponert framsyninga Østafor sol og måne (1994), som inngjekk i kulturprogrammet under OL på Lillehammer, musikk til musikalen Uren, luren, himmelturen for Hedmark teater (tekstar av Per Aas-Eng og Rolf Norsen, 1998) og Babels forståelse for Førde internasjonale folkemusikkfestival (1999). I 2000 samarbeidde ho med komponisten Dag Øyvind Rebnord om korkomposisjonen Kvinnesagn (2000), der dei skreiv kvar sine delar.

 

Ove Røsbak: «Verdensmusikeren», Spelemannsbladet nr. 3/ 2009

Vegar Vårdal: «Tone Hulbækmo», Norsk biografisk leksikon, bd. 4. Oslo 2001

Først publisert: 21.02.2011
Sist oppdatert: 03.05.2013