Helga Hjetland

Helga Kjellaug Hjetland er fødd i Vågsøy (no Kinn) i Sogn og Fjordane (no Vestland) og er oppvaksen på Sandane i Nordfjord. Ho er utdanna adjunkt frå Stord lærarhøgskule (1969–1971), med tilleggsfaga samfunnsfag og kristendom ved Lærerskolen i Bergen (1972–1973).

Ho har arbeidd som lærar i Høyanger (1971–1972) og ved Løvås skole i Bergen (1973–1982), og som lærar og rektor ved Kyrkjebø skule i Høyanger fram til 1988, då ho blei tillitsvald på heiltid som leiar av Sogn og Fjordane Lærarlag (1988–1995). Hjetland var leiar i Norsk Lærarlag (1994–2001) og deretter den første leiaren i Utdanningsforbundet (2001–2009), etter at Norsk Lærarlag og Lærerforbundet fusjonerte. Etter at ho gjekk av med pensjon blei ho mellom anna engasjert av Kunnskapsdepartementet i eit femårig prosjekt som skal følgje med på den nye lærarutdanninga.

Hjetland var medlem av Bjørgvin bispedømeråd i 1990–1994 og leiar i 1994–1995. Ho har vore styreleiar for FN-sambandet (frå 2007), styremedlem i UNICEF Noreg (frå 2002) og styremedlem i Noregs Mållag (frå 2010 til 2016).

• skule og utdanning i Noreg
• Utdanningsforbundet
• Norsk Lærarlag
• adjunkt