Faktaboks

Cornelius Jakhelln
Fødd
31. august 1977, Kristiansand
Cornelius Jahelln.
Av /Samlaget.

Cornelius Jakhelln er forfattar, poet, musikar, omsetjar og journalist. Fantasirikdom og mangfald kjenneteiknar både stil, språk og sjangerval i forfattarskapen.

Bakgrunn

Cornelius Jakhelln er fødd i Kristiansand. Han har cand.mag.-grad i fransk og filosofi frå Universitetet i Oslo i 2001 og mastergrad i filosofi frå Université de Paris i 2004. Forfattaren har publisert tekstar i mellom anna Dagbladet, vore reporter for Morgenbladet i 1999–2001 og Dagsavisen i 2004-2005, og spaltist for Klassekampen i 2010–2013. Jakhelln er òg musikar og tekstforfattar og har gitt ut ei rekkje album med svartmetallbanda Solefald, Sturmgeist og G.U.T.

Forfattarskapen

Forfattaren nyttar både nynorsk, bokmål og dialekt i tekstane sine. Han leikar med sjangrar og med språket, som er rikt på bilete, direkte og treffsikkert. Frisk humor, viltre innfall og raske vekslingar kjenneteiknar stilen. Med fantasi og kunnskap finn Jakhelln temaa sine i norrøn mytologi og eiga samtid.

Lyrikk

Jakhelln debuterte som lyrikar med diktsamlinga Gebura Muse (2001), fulgt av Yggdraliv (2004), Fagernorn (2006) og Galderhug (2008), som alle inngår i eit diktarisk prosjekt med tittelen «Quadra Natura». Dikta krinsar rundt den norrøne mytologien, er mangfaldige og sterkt skiftande i stil og perspektiv. Trisyn (2010) er den første samlinga i ein dikttriologi skriven på konservativt nynorsk, noko som skaper eit eige samspel mellom språk og innhald.

Romanar

Sagaromanen Gudenes fall (2007) er både underhaldande, filosofisk og samfunnskritisk. Dei norrøne gudane mislikar kristninga av Noreg og ønskjer seg makt over menneska igjen. I den sjølvbiografiske boka Raseri. En hvitings forsøk på en selvbiosofi (2011) diskuterer forfattaren eigen radikaliseringsprosess i studenttida. Jakhelln har omsett fleire biletbøker av Stephanie Blake og har sjølv gitt ut barneboka Rikke gidder ikke! (2008). Nazi Jihad (2017) er forfattaren si første ungdomsbok og handlar om nynazisme og islamisme, og om korleis normal ungdom vert radikalisert.

Utmerkingar

Jakhelln har fått ei rekkje stipend frå Tekstforfatterfondet i perioden 1998–2015, Den Norske forfatterforening i 2002–2011 og Norsk Kulturråd i 2009–2016. Han fekk førsteprisen i Cappelen sin nordiske romankonkurranse for Gudenes fall i 2007 og Fabelprisen for den same boka i 2008. Solefald sitt album Red for Fire vart nominert til Alarmprisen i 2006, medan Norrøn livskunst vart nominert til Spellemannprisen i 2011.

Bibliografi

  • Livshjulet (Lyrikk, Cappelen Damm, 2020)
  • Verdenshavet (Roman, Cappelen Damm, 2019)
  • Nazi jihad (Roman, Propagenia press, 2017)
  • Kulden er de andre. Ungdomsdikt 1994-1997 (Lyrikk, Cappelen Damm, 2016)
  • Germania (Roman, Pelikanen, 2014)
  • Umgangskrigen. Skaldskap etter norrønasongen (Lyrikk, Cappelen Damm, 2013)
  • Nazi jihad (Ungdomsbok, Cappelen Damm, 2011)
  • Raseri (Essays, Cappelen Damm, 2011)
  • Kosmopolis. Dikt frå den norrøne diaspora (Lyrikk, Samlaget, 2011)
  • Trisyn (Samlaget, 2010)
  • Voguesville (Roman, Cappelen Damm, 2009)
  • Quadra Natura Galderhug / Spellmind (Lyrikk, Cappelen Damm, 2008)
  • Rikke gidder ikke! (Barnebok, Cappelen Damm, 2008)
  • Gudenes fall (Roman, Cappelen, 2007)
  • Fagernorn (Lyrikk, Tiden, 2006)
  • Yggdraliv (Lyrikk, Tiden, 2004)
  • Gebura Muse (Lyrikk, Aschehoug, 2001)

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg