Katrín Jakobsdóttir

Katrín Jakobsdóttir er fødd i Reykjavík på Island. Katrín Jakobsdóttir er utdannet filolog ved Islands universitet (Háskóla Íslands) 2004 med fagene islandsk, litteratur og fransk. Ho tok ein bachelorgrad i islandsk og fransk i 1996–1999 og deretter mastergrad i islandsk litteratur ved Háskóli Íslands (Universitetet på Island) i 2004 med ei oppgåve om krimforfattaren Arnaldur Indriðason.

Katrín Jakobsdóttir har vore representant på Alltinget for partiet Venstrerørsla – Dei grøne sidan 2007. Partiet er mest likt det norske Sosialistisk Venstreparti (SV). Ho var parlamentarisk leiar i 2007–2009 og utdannings-, forskings- og kulturminister i Johanna Sigurdardottir si regjering i 2009–2013. Ho blei leiar av partiet i 2013, og etter valet i 2017 blei ho som ein av dei mest populære politikarane i landet den andre kvinnelege statsministeren i Islands historie.

Venstrerørsla, det nest største partiet i Alltinget, danna saman med Sjølvstendepartiet og Framstegspartiet ei brei koalisjonsregjering med Jakobsdóttir som statsminister, den sjette regjeringa på ti år. Island, med sine 340 000 innbyggjarar, blei hardt råka av finanskrisa i 2008. Det førte til rekordstor arbeidsløyse, men landet har hatt stor økonomisk vekst dei siste åra, mellom anna på grunn av ein stor auke i turismen.

Folk på Island venta endringar i den politiske kulturen, og etter fleire tidlegare politiske skandalar ville Katrín Jakobsdóttir arbeide for å vinne tilbake befolkninga på Island si tillit til styresmaktene. Dette ville ho gjere gjennom mellom anna å auke dei offentlege utgiftene.

Katrín Jakobsdóttir er feminist og miljøforkjempar, oppteken av likestilling og vil arbeide for å oppnå lik løn for likt arbeid. Ho vil utnytte ressursane til Island meir fornuftig og berekraftig og gjere landet karbonnøytralt innan 2040. Jakobsdóttir var kritisk til tidlegare president Donald Trump i USA og er imot islandsk medlemskap i EU og NATO.

• Island
• Islands historie
• Islands politiske system
• Islands samtidshistorie