Hopp til innhold

Bergljot Kaslegard

Bergljot Kaslegard er ein norsk forfattar og litteraturformidlar frå Ål i Hallingdal. I fleire av bøkene sine skriv ho med djup innleving om alderdom og tilbakeblikk på livet slik det vart.

Bergljot Kaslegard er fødd i Ål i Hallingdal 15. oktober 1976, men voks opp i Førde. I vaksen alder flytta ho attende til Ål, der ho bur i dag. Ho er utdanna ved Norsk barnebokinstitutts forfattarlinje og har ein mastergrad i litteraturformidling frå Universitetet i Oslo.

I 2009 debuterte Kaslegard som forfattar med romanen Magda, under namnet Bergljot K. Nordal. Etter den tid har ho gitt ut fleire romanar: Ruts bok (2012), Det ingen har fortalt deg (2013), Bare la meg være i fred (ungdomsroman, 2016) og Det som nesten er sant (2017). Dessutan gav ho ut diktsingelen Slik på Flamme Forlag i 2014. I tillegg til skrivinga arbeider Kaslegard som pianolærar.

I tre av vaksenromanane har Kaslegard skrive om eldre menneske, og ho skriv seg inn i sjangeren «personleg minnelitteratur». Dei tre bøkene heng lausleg saman, fordi dei alle handlar om Magda og mannen hennar, Bodvar, og venninna Rut. I den første boka er Magda hovudperson, medan Rut er den sentrale i Ruts bok. I Det som nesten er sant følgjer vi tankane til halvt demente Bodvar, som framleis slit med minnet om faren som forsvann for familien då Bodvar var ung. I alle tre bøkene viser Kaslegard stor evne til å leve seg inn i tankeverda til eldre menneske.

Dei tre første bøkene skreiv Kaslegard på nynorsk, medan ho seinare har brukt bokmål.

Kaslegard fekk tildelt Buskerud Mållags målpris i 2010 og fekk Tanums kvinnestipend i 2014.

Kjelder

E-post frå Bergljot Kaslegard 24.2.2018

Forfattarprofil på Tiden Norsk Forlag, tiden.no: http://www.tiden.no/forfatterprofiler/bergljot-kaslegard [lesedato 23.2.2018]

Forfattarprofil på Aschehoug, aschehoug.no: https://www.aschehoug.no/Forfattere/Vaare-forfattere/Bergljot_Kaslegard [lesedato 23.2.2018]

Peikarar

BOK365: «Tanum-stipend til Bergljot K. Nordal», bok364.no, publisert 17.11.2014 

Victoria Jelsø Spanthus: «Om tøffe kamper i skolevesenet», intervju med Bergljot K. Nordal, bok365.no, publisert 17.3.2016 

Først publisert: 11.05.2018
Sist oppdatert: 11.05.2018