Hopp til innhold
X
Innhald

Ivar Kleiva

Ivar Krohn Gunvald Kleiva, lærar og politisk engasjert kulturaktivist. Han gav ut fleire barnebøker, men skreiv òg dikt og prosa for vaksne.

Ivar Kleiva var fødd 17. mai 1903 i Eidsdal i Norddal på Sunnmøre og døydde 5. mai 1998. Etter examen philosophicum ved Universitetet i Oslo i 1925 tok han eksamen ved Stord lærarskule i 1926 og Statens husflidskule på Blaker i 1932.
Kleiva var lærar ved Gryllefjord skule i Torsken i Troms 1927–1940, Farstad skule i Haram på Sunnmøre 1940–46, og styrar ved Dalsøyra skule i Gulen i Sogn 1946–70.
Etter debuten med barneboka Med Steggen på Storegga (1946) skreiv han åtte barnebøker. Kleiva skreiv òg bygdebøker, artiklar og dikt. Nokre av dikta finst i siste boka, Nedfallsfrukt (1995), med framside av Per Kleiva, som òg har illustrert nokre av barnebøkene. Hovudpersonane er ofte positive kvardagsheltar. Kleiva kan òg opne for ei fantastisk reise i tid og rom, som i Hugin på vidvank (1950), eller, som i dikt som «Bruktbilen», ta lesaren med inn i ei nonsensverd.
I dikta for vaksne kan ein møte eit opprørsk, men kjenslevart diktar-eg. Kleiva skreiv òg songar med nasjonalromantisk karakter. «Draumelandet» sette han melodi til. Kordirigent, foredragshaldar og radiokåsør var han òg.
Kleiva hadde formannsverv i Torsken og Gulen Arbeidarparti, samstyret til folke- og skuleboksamlingane i Haram, Gulen folkeboksamling og frilynde ungdomslag.
Kleiva fekk Noregs Lærarlags reisestipend i 1953, Melsomprisen i 1954, Norddals Kulturpris i 1983 og Kongens fortenestemedalje i 1983.
Kjelder
Tor Åge Bringsverd, Tordis Fosse og Ragnar Hovland (red.): Folk flest trur ikkje på fuglar. Oslo 1986
Tor Åge Bringsværd, Tordis Fosse og Ragnar Hovland (red.): Landet på den andre sida. Oslo 1987
Konrad Helseth: Sunnmørsbibliografi, utgitt av Sunnmøre Historielag og Ålesunds Museums Akademi. Ålesund 1981
Gudmund Hovdenak: Nord-norsk barne- og ungdomslitteratur frå Petter Dass til Arvid Hanssen. Tromsø 1989
Ivar Kleiva: Nedfallsfrukt (dikt i utval, med føreord av Erling Indreeide, og med biografiske opplysningar og oversyn over den litterære produksjonen). Norddal 1995

Først publisert: 25.11.2011
Sist oppdatert: 25.11.2011