Faktaboks

Odveig Klyve
Fødd
29. januar 1954, Hardanger, Vestland
Odveig Klyve
Odveig Klyve er lyrikar, barnebokforfattar, manusforfattar og regissør.
Av /Cappelen Damm.

Odveig Klyve er ein norsk forfattar og regissør som skriv lyrikk, barnebøker og filmmanus.

Odveig Klyve er fødd i Hardanger. Ho har gått på Skrivekunst-akademiet i Bergen, Sosialhøgskolen i Stavanger og har studert film og massemedia ved Høgskolen i Stavanger (begge no Universitetet i Stavanger).

Klyve debuterte som lyrikar med boka Rift i 1993 og har sidan gitt ut diktsamlingar, barnebøker og ein roman. Ho har òg skrive teaterstykker. Klyve har gjendikta til norsk den iranske poeten Forugh Farrokhzad (Ein annan fødsel, 2002), den palestinske poeten Fadwa Tuqan (Aleine med dagane, 2005), dei engelskspråklege poetane Sarah Maguire (Granatepla i Kandahar, 2011), Gerda Mayer (Alle blad har mist sitt tre, 2013) og Kit Kelen (Glasfjorden, 2019). Klyve sine dikt er omsett til ei rekkje språk, mellom anna arabisk, engelsk, fransk, kinesisk, russisk, gælisk, hindi og rumensk.

Klyve arbeider med film, både som manusforfattar og som regissør. Ho har hatt manus og regi på ei rekkje kortfilmar, og fleire er blitt viste på filmfestivalar i Europa, USA og India. Klyve hadde ansvar for regi, manus, foto og lyd til Sju songar frå det som blir til (2006), ein filmsyklus med sju kortfilmar frå Palestina og Noreg. Klyve vart representert på Statens Kunstutstilling (Haustutstillinga) i 2012 med eit videoverk.

Klyve fekk Stavanger Aftenblads kulturpris i 2005 og Ordknappen frå Leser søker bok i 2007 for boka Glad i deg.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg