Faktaboks

Olav Kolltveit
Fødd
9. april 1894, Tørvikbygd i Jondal (no Kvam), Vestland
Død
28. november 1979, Odda, Vestland
Verke
Redaktør og lokalhistorikar
Familie

Foreldre: Landhandlar Johannes Kolltveit (1857–1930) og Anna Ragnhild Ljones (1860–1912).

Gift 1939 med telegraffullmektig Magnhild Holmboe (4.11.1900–1.9.1979), dotter til prost Leonard Christian Borchgrevink Holmboe (1872–1953) og Thea Louise Shetelig (1878–1973).

Olav Kolltveit
Av /Stortingsarkivet.

Olav Kolltveit var redaktør, lokalhistorikar og politikar. Som redaktør for avisa Hardanger i nesten to mannsaldrar, og som forfattar av dei fleste bygdebøkene i regionen, har han sett djupe spor etter seg i sakprosaen frå og om Hardanger.

Olav Kolltveit var fødd i Tørvikbygd i Jondal (no Kvam) i Hardanger. Han gjekk på Hardanger folkehøgskule i 1912–1913, Volda private middelskule i 1914–1915 og Voss private gymnas i 1915–1917. I 1917 fekk han tilbod om å verte redaktør for avisa Hardanger, som kom ut i Odda, ei stilling han hadde i 53 år. I 1937–1979 redigerte han òg det regionalhistoriske tidsskriftet med same namn og var den drivande krafta i Hardanger Historielag.

Som bygdebokforfattar har Kolltveit kombinert grundig kjeldearbeid med sine gode evner til å sjå samanhengane i lokalsamfunna. Han har skrive bøker om Strandebarm og Varaldsøy, Jondal, Odda, Ullensvang og Kinsarvik, Eidfjord, Granvin og Ulvik, i alt 13 bøker med til saman over 7200 sider, og dessutan ei rekkje andre jubileumsbøker og lokalhistoriske artiklar. For dette arbeidet fekk han Kongens fortenestemedalje i gull i 1964 og Norsk Kulturråds lokalhistorikarpris i 1975.

Kolltveit var venstremann og tok aktivt del i lokalpolitikken i Odda gjennom 23 år. I periodane 1937–1945 og 1949–1957 var han vararepresentant til Stortinget.

Les meir i Store norske leksikon

Eksterne lenker

Litteratur

  • Magne Velure: «Olav Kolltveit (1894–1979)», Hardanger 1979, s. 1–3.

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg