Tore Kvæven

Tore Kvæven er fødd i Stavanger i Rogaland. Han var elev ved Lyngdal jordbruksskule i 1988–1989 og studerte til sivilagronom ved Noregs landbrukshøgskole på Ås (no NMBU – Norges miljø- og biovitskaplege universitet) frå 1990 til 1994. Studieåret 2003–2004 tok han pedagogikk ved Høgskolen i Agder (no Universitetet i Agder). Kvæven var jordbrukssjef i Forsand kommune (no Sandnes) i 1995–1996 og 1998–2000. Han har òg arbeidd som lærar, i tillegg til å vere sauebonde og forfattar.

Debutromanen Hard er mitt lands lov (2011) er ei historisk forteljing. Handlinga er lagd til år 1010, og lesaren får følgje eit norsk vikingskip på tokt i det indre av Kongo i Afrika. Romanen er skriven på eit arkaisk nynorsk og slektar slik på islendingesogene. I 2013 gav Kvæven ut den humoristiske barneboka Kameljegeren.

I romanen Når landet mørknar (2018) dreg ungguten Arnar Vilhjalmson på si første kvalrossjakt. Året er 1293, og Arnar drøymer om å byggje eit skip og segle mot ei betre framtid. Handlinga er lagd til Vesterbygda på Grønland og skildrar ein sivilisasjon i bryting mellom norrøn og kristen tid.

I 2018 fekk Kvæven Brageprisen for Når landet mørknar. For same boka fekk han Sørlandets litteraturpris i 2019. I 2019 fekk han òg Sirdal kommune sin kulturpris.

• Når landet mørknar (Roman, Samlaget, 2018)
• Kameljegeren (Barnebok, Samlaget, 2013)
• Hard er mitt lands lov (Roman, Samlaget, 2011)

• Noregs litteraturhistorie
• roman
• nynorsk
• Noreg i høymiddelalderen

• Det Norske Samlaget si forfattarside om Tore Kvæven