Faktaboks

Kjell Opseth

Kjell Olav Opseth

Fødd
2. januar 1936, Førde, Vestland
Død
3. desember 2017, Førde, Vestland
Verke
Politikar
Familie

Foreldre: Fabrikkeigar Karl Opseth (1896–1964) og Orlaug Bruland (1894–1978).

Gift 1963 med barnepleiar Hjørdis Årberg (14.10.1934–), dotter til bonde Torstein Årberg (1883–1979) og Oline Birkeland (1894–1977).

Kjell Opseth.
Av /Stortinget.

Kjell Opseth var ingeniør og tidlegare statsråd for Arbeidarpartiet. Opseth viste handlekraft som samferdselsminister ved å få på plass store prosjekt som hovudflyplassen på Gardermoen og ny stamveg mellom Bergen og Oslo.

Bakgrunn

Kjell Olav Opseth var fødd i Førde (no Sunnfjord) i Sogn og Fjordane (no Vestland). Etter elektrikarlina ved Sogndal yrkesskule (1955–1956), gjekk han Skiensfjordens tekniske fagskole for å verte ingeniør (1959–1962). Han arbeidde ei tid som ingeniør og arbeidsleiar, før han i 1966 tok til som installasjonssjef ved Førde kommunale elektrisitetsverk. Frå 1975 til 1985 arbeidde han som installatør og disponent ved A/S NEBB i Førde. I 2001 skipa Opseth sitt eige rådgivingsfirma.

Politisk karriere

Frå 1966 til 2001 hadde Opseth mange sentrale politiske tillitsverv. Mellom anna var han leiar for Sogn og Fjordane Arbeidarparti (1978–1981) og medlem av Arbeidarpartiets landsstyre (1979–1985). Frå 1981 til 2001 møtte Opseth fast på Stortinget for Sogn og Fjordane Arbeidarparti. Dei første periodane var han medlem i energi- og industrikomiteen, før han meir og meir vart ein markant samferdselspolitikar. Opseth var statsråd i Samferdselsdepartementet i Gro Harlem Brundtlands tredje regjering (1990–1996). Då Thorbjørn Jagland overtok som statsminister i 1996, vart Opseth statsråd for Kommunal- og arbeidsdepartementet (1996–1997).

Opseth var kjend som ein pragmatisk og fryktlaus samferdselsminister. Opseth fekk tilnamnet «Hestehandlaren» og viste handlekraft ved å skaffe seg alliansar på tvers av partigruppene. Slik fekk han mellom anna gjennomført store samferdselsprosjekt i si tid som statsråd. Hovudflyplassen på Gardermoen og stamvegen E16 mellom Bergen og Oslo gjennom den lange Lærdalstunnelen, er gode døme på det. Kjell Opseth var òg statsråden som avvikla telemonopolet i Noreg.

Les meir i Store norske leksikon

Eksterne lenker

Litteratur

  • Dag H. Nestegård: Hestehandlaren Kjell Opseth. Oslo 2016

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg