Hege Haukeland Liadal er politikar og tidlegare stortingsrepresentant for Arbeidarpartiet (Ap) frå Rogaland i 2013–2021.
Hege Haukeland Liadal
Faktaboks
Hege Haukeland Liadal
- Fødd
- 29. november 1972, Haugesund, Rogaland
Bakgrunn
Hege Haukeland Liadal er fødd i Haugesund i Rogaland. Ho tok vidaregåande skule i 1988–1991, deltidsstudium i personal og leiing ved BI i 2004–2005 og er sertifisert coach gjennom konsulentselskapet Storform i 2006. Ho arbeidde som reisekonsulent for Via Ferieverden i 1997–2000, var byråleiar i Star Tour i 2000–2007 og faglærar ved Norges Kreative Høyskole (no Høyskolen Kristiania) i 2002–2009. I perioden 2007–2010 var ho kundesentersjef ved Kolumbus (Rogaland Kollektivtrafikk FKF), deretter dagleg leiar i Adecco i Haugesund i 2010–2012 og prosjektkoordinator ved HKV (Haugaland Kunstverk) i 2012–2013
Politisk karriere
Haukeland Liadal har hatt verv i AUF i Rogaland, var medlem av kommunestyret og formannskapet i Haugesund for Arbeidarpartiet i 2011–2013 og var kandidat til varaordførarvervet i Haugesund ved valet i 2011. Ho blei vald til stortingsrepresentant for Arbeidarpartiet frå Rogaland for periodane 2013–2017 og 2017–2021. Ho var medlem av familie- og kulturkomiteen på Stortinget i 2013–2017 og medlem av energi- og miljøkomiteen og av helse- og omsorgskomiteen i 2017–2021.
I 2020 vart ho sikta for grovt bedrageri med 22 reiserekningar i perioden frå 2016 til 2018. Liadal har erkjent straffskuld for aktlaust bedrageri, men ikkje for forsettleg bedrageri. Ho vart ikkje renominert før valet i 2021. Politisk var Haukeland Liadal engasjert i kulturpolitikk og har mellom anna arbeidd for meir filmstøtte og å auke tilskotet til Haugalandsmuseene.
Andre verv
Ho har òg hatt ei rekkje andre verv, mellom anna som medlem av styret i Human-Etisk Forbund avd. Haugaland i 1988–1990, meddommar i Stavanger tingrett 2002–2009, i fylkesnemnda for sosiale saker i 2007–2009 og i Gulating lagmannsrett i 2009–2013. Frå 2009 til 2012 var ho nestleiar i Norsk Folkehjelp avd. Haugaland. Haukeland Liadal var òg medlem av styret for Troms Fylkestrafikk i 2011–2015, er styreleiar for Rutebåten Utsira AS og medlem av styret i Norsk Bibliotekforening frå 2016.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.