Faktaboks

Ingmar Ljones
Fødd
3. desember 1943, Strandebarm (no Kvam), Vestland

Ingmar Ljones er ingeniør, lærar og politikar. Som KrF-politikar og tidlegare stortingsrepresentant har han vore særleg oppteken av fag- og yrkesopplæring og sosialpolitikk.

Ingmar Ljones er fødd i Strandebarm (no Kvam). Han kom til Bergen for å gå på skule i ungdomstida og har budd der sidan, frå 1966 i Arna. Han starta yrkeskarrieren sin som industriarbeidar i firmaet Mjølner, før han tok teknisk utdanning ved maskinlinja ved Bergen tekniske skole 1965–1968. Han fullførte pedagogisk utdanning i 1973, med spesialpedagogikk som tillegg i 1979. Ljones arbeidde som faglærar, rådgivar og inspektør ved Arna yrkesskule i 1972–1986, der han mellom anna var sterkt engasjert i fengselsundervisninga på Ulvsnesøy. I 1986–1991 var han konsulent i Hordaland fylkeskommune, der han arbeidde med opplegg for elevar som trong ekstra ressursar.

Ljones sitt sosialpolitiske engasjement førte til verv i sosialstyre, barnevernsutval, edruskapsnemnd og hovudutval for skule i Bergen i 1980-åra. I 1991–1995 og 1999–2000 var han varaordførar i Bergen, i 1995–1999 og 2000–2001 ordførar. I 2001–2005 var han stortingsrepresentant frå Hordaland for Kristeleg Folkeparti og sat då i energi- og miljøkomiteen. I 2005–2009 var han vararepresentant. Ljones har hatt og har ei rekkje offentlege verv, mellom anna som leiar i Felleskyrkjeleg råd og i styret for bybana i Bergen.

Han fekk i 1997 tildelt den islandske Storriddarkrossen, i 1998 den tyske Stor fortenestekross og Kongens fortenestemedalje i 2011.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg