Josef G. Larssen var fødd 23. november 1918 i Stavanger og døydde 5. desember 2014, 96 år gamal. I oppveksten flytta han og familien til Skudeneshavn, og han budde òg i Danmark og på Jæren, før han i 1948 til slutt slo seg ned på Austlandet.

Larssen, som var utdanna agronom, byrja tidleg å skrive songtekstar, mellom anna til revyar. Frå 1958 til 1988 arbeidde han som vaktmeister ved Noregs landbrukshøgskule på Ås, og der var han i ei årrekkje ein viktig bidragsytar til studentrevyane.

Mange kjenner tekstane til Larssen frå plateinnspelingar med artistar som Salhuskvintetten, Kari og Ivar Medaas og Stanley Jacobsen. I samarbeid med komponisten Monrad Holm Johnsen laga Larssen populære viser som «I morgon, i morgon», «Ver glad i den nasen du har» og «Da ska' bli andre boller når papen kjem heim til jul». Larssen, som hadde ei søster på Lindås, kjende kystkulturen i Hordaland godt, noko som viser att i tekstane hans. I visene skildrar Larssen kvardagsliv, kjærleik og lagnader i eit vestlandsk kystlandskap, der sjøen, vêret og årstidene ofte spelar ei viktig rolle.

Kjelder

Knut Langeland: Minneord i gravferda til Josef G. Larssen

Henrik Christie: «Her tar Ås farvel med visekunstner Josef G. Larssen», Ås avis 12.12.2014

Josef G. Larssen: I morgon, i morgon, men ikkje i dag. Stavanger 2005

Stian Slaatten Skistad og Håkon Sandberg Johansen: Ås-studenter i 150 år, bd. 2. Ås 2014

Peikarar

Josef G. Larssen: Da ska' bli andre boller og andre viser. Oslo 1975. Tilgjengeleg på Nasjonalbiblioteket, nb.no

Randi Bjørlo: «– Har betydd mykje for strilekulturen», nordhordland.no, publisert 21.12.2014

Rockipedia: «Josef G. Larssen», rockipedia.no

Stanley Jacobsen: «I morgon, i morgon» (1976), med tekst av Josef G. Larssen, youtube.com