Hopp til innhold
X
Innhald

Livius Smitt

Livius Smitt (1840-1890) frå Vinje. Overrettssakførar i Florø frå 1867 til 1881, då han vart byfut i Brevik. Ordførar i Florø 1874-1881.

Gjennom giftarmål var han nært knytt til Venstre-høvdingane Johan og Harald Ulrik Sverdrup (sjå Balestrand kommune), men representerte sjølv Høgre på Stortinget – først som vararepresentant 1877-1879, og som fast representant 1880-1882. Etter at han flytta til Brevik, var han tre gonger stortingsrepresentant derifrå. Vart boden plass som statsråd i Emils Stangs regjering, men takka nei.

I tida i Florø var han med og grunnla «Nordre Bergenhus Amtstidende» og eigde fleire bygningar i sentrum som seinare er tekne over av handelsfamilien Trovik.

Han var ein av skiparane av Florø Træplantningsselskab kring 1870. Dette selskapet skogkledde Storåsen og Likkjeåsen og bygde gangstiar rundt i terrenget. Livius Smitt har fått ei gate oppkalla etter seg i Florø.

Smitt var ein habil felespelar og forma mellom anna ut «Prestegangaren», som bygde på slåtten «Lofthusen» etter Lars Lofthus frå Voss. Slåtten «Livius Smitts Minne» vart komponert av Lars Fykerud til ære for Livius etter at han døydde i 1890.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 28.10.2020