Faktaboks

Anstein Myhr
Fødd
21. januar 1866, Vang (no Hamar), Hedmark
Død
19. august 1936, Gjøvik

Anstein Myhr var ungdomslagsorganisator, venstrepolitikar og revisjonssekretær. Han var sentral i skipinga av Noregs Ungdomslag og den første skrivaren i styret.

Anstein Myhr var fødd i Vang i Hedmark, og voks opp på garden der foreldra var gardsarbeidarar hos farbroren Nils. I 1886 tok han examen artium ved Hamar gymnas og deretter første klasse ved krigsskulen (1890).

Frå 1891 arbeidde han som funksjonær i eit advokatfirma i Kristiania, og i 1908–1916 hadde han ei eigedomsforretning. I 1916–1918 dreiv han ein gard i Nittedal og i 1918–1923 eit gods i Sverige, før han frå 1924 fekk tilsetjing i statsrevisjonen ved Raufoss ammunisjonsfabrikker, der han var til 1936.

Myhr la i 1890-åra ned eit stort arbeid i Venstre og ungdomslagsrørsla. I ungdomslaget Fram (skipa 1892) var Myhr formann det meste av tida mellom 1893 og 1900, og han representerte laget i hovudstyret for Kristiania Venstre i 1895–1999. Som formann i Fram var han ei drivkraft bak skipinga av Eidsiva ungdomslag (1895) og Noregs Ungdomslag (1896). Myhr var ordstyrar på skipingsmøtet til Noregs Ungdomslag og skrivar og den sterkaste krafta i styret dei to første åra. Han spela ei vesentleg rolle både for at Noregs Ungdomslag vart skipa, og for at banda til Venstre vart så tette.

Les meir i Store norske leksikon

Eksterne lenker

Litteratur

  • Myhr, Anstein (1921): «Frå dei fyrste arbeidsåra», i Sven Moren og Edvard Os (red.): Den frilynde ungdomsrørsla. Norigs ungdomslag i 25 år. Oslo: Noregs Ungdomslag. Les hos Nasjonalbiblioteket
  • Hoel, Oddmund L. (2011): Norsk målreising II. Mål og modernisering 1868–1940. Oslo: Det Norske Samlaget

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg