Faktaboks

Benedicte Maurseth
Fødd
7. februar 1983, Eidfjord i Hardanger, Vestland
Benedicte Maurseth.
Av /Benedicte Maurseth sin eigen nettstad.

Benedicte Maurseth er ein norsk musikar, komponist og skribent.

Bakgrunn

Benedicte Maurseth er fødd i Eidfjord i Hardanger, Hordaland (no Vestland). Ho byrja å spele hardingfele som sjuåring, med Knut Hamre som lærar. I tillegg til studiar ved Universitetet i Bergen (grunnfag i kunsthistorie) var ho i perioden 2004–2006 student ved Ole Bull AkademietVoss.

Folkemusikk

I tillegg til hovudinstrumentet hardingfele spelar Maurseth barokkinstrumentet viola d'amore. Ho er også kvedar. Maurseth har sidan 2005 hatt omfattande konsertverksemd nasjonalt og internasjonalt (mellom anna i USA, Canada, India, Tyskland, Belgia og på Island), både som soloartist og i samspel med andre. Maurseth har skrive boka Å vera ingenting (2014), som inneheld samtalar med Knut Hamre om mellom anna folkemusikk. Ho har òg hatt fast folkemusikkspalte i Dag og Tid.

Saman med Knut Hamre, Nils Økland og Sigbjørn Apeland gav Maurseth i 2006 ut Rosa i botnen, som CD og dokumentar-DVD, ein produksjon med tradisjonsmusikk frå Hardanger framført på hardingfeler frå 1600- og 1700-talet. Dette er dei eldste hardingfelene som er bevarte, og det var første gongen dei blei brukte ved ei plateinnspeling. I 2008 stod Maurseth saman med Berit Opheim, Åsne Valland Norli og Kristin Skaare bak plateprosjektet Fodne ho svara so stilt, som er bygd på folkemusikk frå Hardanger samla inn av Geirr Tveitt.

I 2009 komponerte ho ny musikk til ein teaterversjon av Jon Fosse-teksten Andvake, og ho stod sjølv på scenen saman med skodespelar Svein Tindberg. Musikken hennar frå Andvake ligg til grunn for den første soloplata hennar, Alde (2010). Ho har òg ved fleire høve opptredd saman med Fosse sjølv. Saman med Gabriel Fliflet, Stein Urheim, Kristoffer Voght og Per Jørgensen gav Maurseth ut plata Åresong i 2011, med Fosse sine songtekstar. Åresong var eit tingingsverk til Festspillene i Bergen i 2010. Maurseth har seinare vore del av fleire slike musikalske samarbeid, i tillegg til å ha gitt ut eigne soloalbum.

Utmerkingar

Maurseth blei i 2007 kåra til Årets unge folkemusikar, ei utmerking som inkluderer det toårige lanseringsprogrammet INTRO-folk. Ved tildelinga framheva juryen også dei sceniske eigenskapane hennar. I 2017 vart ho tildelt NOPA sin musikkpris for verket Tidekverv, og i 2018 fekk ho Vossa Jazz-prisen.

Diskografi

  • Be Here Whenever (2021)
  • Blått Svev (2019)
  • Benedicte Maurseth (soloalbum, 2019)
  • Tidekverv (2018)
  • Over Tones (2014)
  • Anima (2012)
  • Alde (soloalbum, 2010)
  • Fodne ho svara stilt (2008)
  • Rosa i botnen (2006)

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg