Faktaboks

Ingeborg Mjør
Fødd
28. november 1962, Bergen, Vestland
Død
27. september 2014

Ingeborg Mjør var førsteamanuensis i litteraturvitskap og barnebokkritikar som forska på barnelitteratur, lesing og mediebruk.

Bakgrunn

Ingeborg Mjør var fødd i Bergen i Hordaland (no Vestland). Ho var utdanna førskulelærar ved Høgskolen i Bergen (no Høgskulen på Vestlandet) i 1984–1987, cand.mag. i 1993 og cand.philol. i nordisk ved Universitetet i Bergen i 1996. Mjør tok doktorgrad i litteraturvitskap frå Universitetet i Agder 2009 med avhandlinga Høgtlesar, barn, bildebok. Vegar til meining og tekst.

Ho var avdelingsleiar ved Vognstølen barnehage i Bergen 1987–1996, universitetslektor ved Universitetet i Stavanger 1998–2010 og førsteamanuensis ved lærarutdanninga ved Høgskolen i Bergen frå 2010.

Barnelitteraturen

Saman med Tone Birkeland og Gunvor Risa gav ho ut Barnelitteratur. Sjangrar og teksttypar i 2000 (ny utgåve 2006). Boka er retta mot barnelitteraturstudiet i førskule- og allmennlærarutdanninga.

Ingeborg Mjør og Nina Goga var redaktørar for Møte mellom ord og bilde (2001), og Mjør var redaktør for Kulturbarnehagen (2002). I 2010 kom Temahefte om språkmiljø og språkstimulering i barnehagen, gitt ut av Kunnskapsdepartementet. Medforfattarar er Trude Hoel og Anne Høigård.

Mjør var barnebokkritikar i Bergens Tidende 1997–2000, skreiv barnebokmeldingar for Dag og Tid, var redaktør for kulturavisa for barnehage og småskule, Pirion (2000–2004) og sat i redaksjonen for det digitale tidsskriftet Barnelitterært forskningstidsskrift (frå 2010).

Verv

Mjør var styremedlem i Norsk barnebokinstitutt (2008-2014) og sat i to av underutvala i Kulturrådet (2000–2008). Ho hadde ei rekkje verv i Noregs Mållag gjennom mange år, mellom anna fylkesleiar i Hordaland, leiar i Stavanger Mållag og styremedlem og nestleiar i Noregs Mållag.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg