Hopp til innhold
Sonja Mandt. Foto: Stortinget.
Sonja Mandt. Foto: Stortinget.
X
Innhald

Sonja Mandt

Sonja Mandt, sjukepleiar, politikar og stortingsrepresentant for Arbeidarpartiet frå Vestfold sidan 2005.

Sonja Mandt er fødd 29. mars 1960 i Larvik i Vestfold. Ho var elev ved Sandefjord handelsgymnasium i 1976–79, tok 1. avdeling jus som privatist i 1988–89 og utdanna seg til sjukepleiar ved Høgskolen i Vestfold i 1993–95.

Mandt var kontortilsett ved Felleskjøpet i 1979 og i Brunlanes kommune i 1980, og ho var produksjonsmedarbeidar ved Nestlé Findus A/S i 1980–87. Frå 1995 til 2013 var ho tilsett som sjukepleiar ved Sjukehuset i Vestfold i Larvik. I 2005 blei ho vald til stortingsrepresentant for Arbeidarpartiet frå Vestfold.

Ho var varamedlem i Larvik kommunestyre for Arbeidarpartiet i 1991–95, medlem i 1995–2005 og sat i formannskapet i 1999–2005. Mandt var nestleiar i Larvik Arbeidarparti i 1992–2001, leiar i 2001–04, styremedlem i 2004–10 og nestleiar frå 2012. I 1997–2000 var ho nestleiar og i 2000–14 leiar i Vestfold Arbeidarparti. I perioden 1997–2014 var Mandt medlem av landsstyret til partiet. På Stortinget var ho medlem av helse- og sosialkomiteen i 2005–13 og er medlem av familie- og kulturkomiteen i 2013–17. Politisk har ho arbeidd mykje med helserelaterte emne.

Mandt var kasserar i Human-Etisk Forbund i Larvik i 1989–99 og i Human-Etisk Forbund i Vestfold i 1994–98. Ho hadde ulike verv i Kvelde A-lag i 1990–95 og i Nanset/Verningen A-lag i 1996–2005. Ho var meddomar i Agder lagmannsrett i 1995–2005 og medlem i styret for Link Larvik A/S i 2005–11.

Kjelder

Sonja Mandt, «Representanter og komiteer», stortinget.nohttps://www.stortinget.no/no/Representanter-og-komiteer/Representantene/Representantfordeling/Representant/?perid=SOM  [lesedato 8.3.2016]

Peikarar

Lasse Nordheim og Peder Torp Mathisen: «Intervju med Sonja Mandt (A)»

Jon Cato Landsverk: «– Ergerlig å miste tredjemandatet», tb.no http://www.tb.no/nyheter/tonsberg/vestfold/ergerlig-a-miste-tredjemandatet/s/2-2.516-1.8059755

Sonja Mandt: «– Private helsetjenester tjener ikke de syke», byavisa.sandefjord.no 

Kampen for lokalsykehusene: «Sonja Brandt Bartholsen: Ny fase i sykehuskampen (Larvik)», lokalsykehus.bloggspot.no 

Først publisert: 10.05.2017
Sist oppdatert: 10.05.2017