Faktaboks

Marta Norheim
Fødd
7. desember 1955, Voss, Vestland
Marta Norheim.
Av /Samlaget.

Marta Norheim er kulturjournalist i NRK og ein profilert litteraturkritikar og formidlar av norsk samtidslitteratur etter 1990.

Bakgrunn

Marta Norheim er fødd på Voss i Hordaland (no Vestland). Ho tok examen artium ved Voss gymnas i 1974 og hovudfag i nordisk ved Universitetet i Oslo i 1984, med hovudoppgåva «Diktarkrise – krisedikting. Forfattarrolle i og utanfor bøkene Myten om Wu Tao-tzu av Sven Lindqvist og Herr Gustafsson själv av Lars Gustafsson».

TV og radio

Norheim har sidan 1987 vore tilsett i NRK. Ho har arbeidd med kulturstoff i radio og TV, i program som Kulturoperatørene og Askeladden. Etter kvart har ho spesialisert seg innanfor litteraturfeltet i programma Kritikartorget, Boktilsynet, Bok i P2 og P2-lyttarane sin romanpris.

Forfattarskapen

Norheim gav i 2007 ut boka Røff guide til samtidslitteraturen. Her kombinerer ho nærlesing av einskildtekstar med stort oversyn over trendar og tendensar i det skjønnlitterære feltet i Noreg, representert ved forfattarar som debuterte mellom 1990 og 2005. Forma er engasjert og prega av journalistiske spissformuleringar, når Norheim til dømes kallar samtidstrendar for «Kunsten å overleva barndommen», «Kva er ein mann?» eller «Dirty re(gion)alism». I 2017 kom "oppfølgjaren" Oppdateringar frå lykkelandet: røff guide til samtidslitteraturen, som granskar bøker av forfattarar som debuterte etter 2005.

Utmerkingar

I 2002 vart Norheim tildelt den prestisjetunge kritikarprisen i kategorien Årets kritikar, og i 2009 fekk ho Olav Dalgards kritikarpris. I 2012 fekk ho Språkprisen for essaysamlinga Friksjonar, og i 2014 fekk ho Kringkastingsprisen.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg