Asgeir Olden

Asgeir Olden er fødd i Haram (no Ålesund) i Møre og Romsdal. Han tok examen artium ved Volda gymnas i 1970, studerte jus ved Universitetet i Bergen, tok førsteavdeling jus i 1972 og var vitskapleg assistent i 1972–1975.

Olden byrja i pressa som redaktør for universitetsavisa Studvest i 1976–1977, var så journalist i Sunnmørsposten i 1978–1981 og redaktør i Dag og Tid i 1985–1990. Etter eit år som redaksjonssjef i Bergens Tidende vart han i 1991 tilsett som redaktør og dagleg leiar for Nynorsk Pressekontor, ei stilling han hadde til 2005. Sidan 2005 har han vore nestleiar og fagmedarbeidar ved Institutt for Journalistikk i Fredrikstad.

Olden har skrive ni bøker, mellom anna Juridisk ordliste (1978, ny utgåve 1985), Jon Eikemo – trur eg (1992) og Den vesle redaktørboka (2002). Saman med Jan Olav Fretland har han gitt ut På saklista. Nynorsk språkbruk i statsforvaltninga (2000). I 1988 gav han ut Fødd skuldig, tolv intervju med barn av Nasjonal Samling-medlemer.

Olden var medlem av Norsk språkråd i 1988–2004, oppnemnd av Norsk Presseforbund.

• journalistikk
• Nynorsk Pressekontor
• redaktør
• Norsk språkråd

• Jan Olav Fretland og Asgeir Olden: Nynorsk språkbruk i statsforvaltninga. Oslo 2000
• Ottar Grepstad: Avisene som utvida Noreg. Oslo 2010
• Asgeir Olden: Juridisk ordliste. Skuleboknemnda åt Studentmållaget, Oslo 1978
• Aani Rysstad ofl. (red.): «... allsidig stoff til avisene» 25 år med Nynorsk Pressekontor. Oslo 1994
• Nils E. Øy: Pressefolk 1997. Institutt for Journalistikk, Oslo 1998