Hopp til innhold
X
Innhald

Odd-Bjørn Hjelmeset

Odd-Bjørn Hjelmeset. Foto: Heidi Lise Bakke, NRK.

Odd-Bjørn Hjelmeset. Foto: Heidi Lise Bakke, NRK.

Odd-Bjørn Hjelmeset, fødd 1971, frå Hjelmeset. Langsrennsløpar, medlem av Fjellhug/Vereide-Hyen Skilag.

VM-gull i stafett i 2001

Han slo gjennom i 1991 då han var med på laget som tok stafettgull under junior-VM i Reit im Winkl. Sidan han kom med i den nasjonale elitegruppa 1998, har Hjelmeset m.a. VM-bronse på 10 km klassisk i Ramsau 1999, bronse på 15 km og gull i 4x10 km stafett frå Lathi-VM 2001.

Sølv og bronse i OL

Han kom på tredjeplass i verdscupen samanlagt i 2000, då han vann tre renn. Bronse på 50 km i OL Salt Lake City 2002 og sølv på 4x10 km stafett i Ol i Vancouver i 2010. På femmila i Vancouver vart han nummer 17.

Odd-Bjørn Hjelmeset (t.v.) slår Frode Estil i spurten og blir verdsmeister på femmila i 2007. Foto: Cornelius Poppe, SCANPIX.

Odd-Bjørn Hjelmeset (t.v.) slår Frode Estil i spurten og blir verdsmeister på femmila i 2007. Foto: Cornelius Poppe, SCANPIX.

VM-gull på femmila i 2007

Hjelmeset tok bronse på 50 km klassisk i VM i Oberstdorf 2005, og gull på 4x10 km stafett i VM i 2005, 2007 og 2009. I VM i Sapporo i 2007 tok Hjelmeset gull på 50 km klassisk, og vart med denne sigeren den første frå Sogn og Fjordane som vart verdsmeister i ei individuell idrettsøving.

Ni NM-titlar

Han har til og med 2006 teke ni Noregsmeisterskap: Fellesstart 30 km (2000), sprint (2001), 10-kilometer (2001, 2003), 30 kilometer (2002) jaktstart (2001), skiathlon (2003), 15-kilometer (2004 og 2006).

NM-medaljar i friidrett

Hjelmeset har vunne Birkebeinarrennet to gonger, og har også teke medaljar i nasjonale friidrettsmeisterskap på 3000 meter hinder og i motbakkeløp. Utnemnd til æresmedlem i Fjellhug/Vereide i 2006. Tildelt Gloppen kommune sin kulturpris i 2007. Kåra til Årets namn i norsk idrett i 2007. Tildelt Fylkeskulturprisen i 2008.

La opp i 2011

Hjelmeset la opp den aktive skikarrieren sin i 2011 då han ikkje greidde å kvalifisere seg til VM i Holmenkollen, men han fekk ta avskil med norsk langrennspublikum med å gå femmila i Holmenkollen i 2012, 19 år etter at han debuterte i verdscupen på same staden.

TV-karriere

Etter at han la opp vart han ekspertkommentator for TV2-sporten, og var m.a. ekspedisjonsleiar for TV-programmet «Ingen grenser».

Egebergs Ærespris

I 2012 vart han tildelt Egebergs Ærespris. Prisen blir tildelt idrettsutøvarar som hevdar seg på topp internasjonalt i ei idrettsgrein og på topp nasjonalt i ei anna idrettsgrein. Hjelmeset får prisen for prestasjonane sine i langrenn og friidrett og i tillegg er ein god rollemodell. Han er den første frå Sogn og Fjordane som får denne høge utmerkinga.

Frå v. Lars Berger, Odd-Bjørn Hjelmeset, Eldar Rønning og Petter Northug med gullmedaljane etter sigeren på stafetten i Sapporo i 2007. Foto: Cornelius Poppe, SCANPIX.

Frå v. Lars Berger, Odd-Bjørn Hjelmeset, Eldar Rønning og Petter Northug med gullmedaljane etter sigeren på stafetten i Sapporo i 2007. Foto: Cornelius Poppe, SCANPIX.

Kjelder

Kjeldeliste til Fylkesleksikon for Sogn og Fjordane 

Artikkelen er basert på NRKs Fylkesleksikon for Sogn og Fjordane (2001–2014). Publisert digitalt etter avtale med NRK i 2014. 

I 2021 tek Vestland fylkeskommune ved Fylkesarkivet over innhaldet i Fylkesleksikon for Sogn og FjordaneDette innhaldet blir derfor ikkje lenger oppdatert på allkunne.no. Feil eller manglar som blir melde inn til post(a)allkunne.no, blir registrerte og overleverte til denye eigaren 

Les meir om overtakinga av Fylkesleksikon for Sogn og Fjordane. 


Sist oppdatert: 01.10.2013