Faktaboks

Anne Raknes
Fødd
20. desember 1914, Kviteseid
Død
17. februar 2001, Oslo
Anne Raknes, Anne-Berit, 1949–1950
/BONO.
Lisens: Vernet verk

Anne Raknes var ein av dei første kvinnelege bilethoggarane i Noreg. Ho var oppteken av fagforeiningsarbeid og mellom initiativtakarane til Norsk Billedhoggerforening.

Bakgrunn

Raknes gjekk på Torstein Torsteinsons målarskule i Oslo i 1934 og studerte ved Kunstakademiet under Axel Revold, Jean Heiberg og Wilhelm Rasmussen frå 1934 til 1938. Første studiereisa gjekk til Berlin i 1936. Seinare vitja ho mellom anna Paris og London. Ho fekk Statens reisestipend fire gonger, Schäffers legat i 1939, og Statens garantinntekt frå 1977. Raknes budde på Ekely og arbeidde i Edvard Munchs gamle atelier.

Virke

Debuten i 1936 var med eit sjølvportrett på Hauststillinga i Oslo, der ho seinare deltok ved fleire høve. Ho stilte òg ut på kollektivutstillingar andre stader i Norden, og hadde nokre separatutstillingar mellom anna i Kunstnernes Hus i Oslo i 1950.

Under andre verdskrigen teikna ho for avisene Friheten og Arbeiderbladet.

Ho var med på å skipe Norsk Billedhoggerforening i 1946, der ho vart varaformann i 1954–1957 og styremedlem 1964–1966. Ho hadde fleire verv som styremedlem; i Unge kunstneres samfunn i 1948–50, Oslo Kunstforening i 1956–1966, Bildende Kunstnerinners Forening i 1964–1966 og Bildende kunstneres styre 1964–67.

Store utsmykkingsoppdrag er Biskop Torlak, Nidarosdomens vestfront i 1932 og Monument over falne, Skedsmo i stein i 1946.

Arbeid av Raknes finst mellom anna i Nationaltheatret, Deichman bibliotek, Aschehoug, Gyldendal, Trondheim kunstgalleri og Nasjonalgalleriet.

Portrett

Portretta til Raknes ber preg av ei raus karakteriseringsevne og psykologisk innsikt. Ho utførte mellom anna portrettbyster av forfattarar som Aslaug Vaa, Tarjei Vesaas, Sigurd Hoel, Aksel Sandemose og Helge Krog.

Ho er representert i Nasjonalmuseet med portrett-teikningar og portrettbystene Anne-Berit (1949) og Aslaug Vaa (1937).

Anne Raknes var dottera til lyrikaren Aslaug Vaa og psykoanalytikaren Ola Raknes.

Les meir i Store norske leksikon

Litteratur

  • Edvard Beyer (red.): Norges litteraturhistorie, bd. 5. Oslo 1975
  • Francis Bull: Norske portretter. Forfattere. Oslo 1956
  • Øistein Parmann: Norsk skulptur. Oslo 1969
  • Dorothea Hysing: «Anne Raknes», i Norsk kunstnerleksikon, bd. 3. Oslo 1986

Faktaboks

Anne Raknes
Historisk befolkingsregister-ID
pc00000002794718

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg