Hopp til innhold
Frå plateomslaget på Vårres jul 2.
Frå plateomslaget på Vårres jul 2.
X
Innhald

Hans Rotmo

Hans Per Rotmo, norsk musikar, låtskrivar og dramatikar. Med gruppa Vømmøl Spellmannslag var han ein føregangsmann for den trønderske dialektrocken.

Hans Rotmo er fødd 10. mars 1948 i Helgådalen i Verdal. Han tok cand.mag.-graden, med mellomfag i historie, ved Universitetet i Oslo i 1973.
Rotmo starta si musikalske karriere i gruppa Valley Boys i 1964. I studietida vart han inspirert av norsk slåttemusikk, noko som sette eit sterkt preg på musikken han laga i 1970- og 1980-åra. I 1973 danna Rotmo Vømmøl Spellmannslag. Gjennom karakterane i den fiktive bygda Vømmøldalen brukte han mykje humor for å skildre utfordringar som folk i Utkant-Noreg opplever. Det er kapitalismen som rår. Med albumet Vømmøl’n (1974) og låtar som «Høvlerivisa» fekk Rotmo og vømmølmusikken mykje å seie for trøndersk dialektrock.
Rotmo heldt seinare fram med gruppene Arbeidslaget hass Konrad Vømmølbakken, Valley Boys og Heimevernslaget, som vidarefører den musikalske tradisjonen frå Vømmøl Spellmannslag. Med figuren Ola Uteligger laga Rotmo kjende songar som «Fire fine lænestola» (1985) og «Møringen» (1987). Rotmo har òg fått stor merksemd for juleplatene Vårres jul (1980) og Vårres jul 2 (2010).
Med gruppa Trossetrua Band kritiserer Rotmo norsk asylpolitikk og songane «Vi fra andre» (2012) og «Svarte telt» (2013) vekte reaksjonar.

Rotmo er òg dramatikar og forfattar. I 2000 vart Bønder i soloppgang sett opp på Trøndelag Teater. I 2001 debuterte han som romanforfattar, med satiren Sendebudet.
Han har fått Verdal kommunes kulturpris (1993) og Nord-Trøndelag fylkes kulturpris (1995).
 
Kjelder
Hans Rotmo: Vømmølmusikken. Komplett 1974–1996. Oslo 1996
Hans Rotmo, biografi, rotmomusikken.no: http://www.rotmomusikken.com/ [lesedato 13.1.2013]
Hans Rotmo, biografi, rockipedia.no: http://www.rockipedia.no/mediateket/norsk-pop-og-rockleksikon/hans_rotmo/ [lesedato 29.1.2013]
Vømmøl Spellmannslag, biografi, vommol.org: http://vommol.org/info/hva-er-vommol/http:/vommol.org/info/hva-er-vommol/ [lesedato 13.1.2013]
Peikarar
Geir Rakvaag: «Vømmøl kommer hjem», dagsavisen.no

Først publisert: 04.11.2013
Sist oppdatert: 28.02.2014