Kjell Ingolf Ropstad er fødd 1. juni 1985 i Arendal og voks opp på Evje i Aust-Agder. Han tok vidaregåande skule på Hornnes i 2001–02 og Drottningborg i Grimstad i 2002–04, tok 1. og 2. avdeling juss ved Universitetet i Oslo og har ein bachelorgrad i juss og økonomi frå Universitetet i Oslo i 2009.

Ropstad var medlem av Evje og Hornnes kommunestyre i 2003–07, medlem av Aust-Agder fylkesting i 2003–09 og leiar av komiteen for utdanning og helse i Aust-Agder fylkesting i 2007–09. Han var nestleiar i KrFU i 2005–07 og leiar i 2007–10. Han var vararepresentant til Stortinget i perioden 2005–09, møtte første gong i 2006 og fekk fast plass på Stortinget for Kristeleg Folkeparti frå Aust-Agder for periodane 2009–21. Miljø- og utviklingspolitikk har lenge vore dei viktigaste områda hans.

Kjell Ingolf Ropstad var andre nestleiar i KrF frå 2017 til 2019, og han blei vald som leiar av partiet 27. april 2019. Sidan januar 2019 har Ropstad vore barne- og familieminister i fleirtalsregjeringa Solberg.

Kjell Ingolf Ropstad, «Representanter og komiteer», stortinget.no: http://www.stortinget.no/no/Representanter-og-komiteer/Representantene/Representantfordeling/Representant/?perid=KJR [lesedato 23.1.2019]

Silje Rognsvåg: «Kjell Ingolf Ropstad er ny partileiar i KrF», nrk.no, sist oppdatert 27.4.2019: https://www.nrk.no/norge/kjell-ingolf-ropstad-er-ny-partileiar-i-krf-1.14529959 [lesedato 29.4.2019]