Hopp til innhold
X
Innhald

Øystein Rosse

Øystein Rosse, omsetjar av barnelitteratur. Han har omsett meir enn 500 bøker til norsk sidan 1976.

Øystein Rosse er fødd 24. juli 1956 i Oslo og er busett i Stavern. Etter vidaregåande skule i Skien (1973–75) tok han eit år på folkehøgskule, før han begynte å omsetje som 20-åring. Rosse har sidan arbeidd frilans som omsetjar, konsulent og formidlar i bibliotek og skular.
Han sett om bøker til norsk frå engelsk, tysk, svensk, dansk, bokmål og nynorsk. Sjangrane er biletbøker, barnebøker, ungdomsbøker, faktabøker og lærebøker og krim, romanar og dokumentarar for vaksne.
Rosse har mellom anna omsett ungdomsseriane Cherub-agentane av Robert Muchamore frå engelsk, Skammarserien og Katrionaserien av Lene Kaaberbøl frå dansk, fantasyserien Sagaen om Darren Shan av Darren Shan og ungdomsbøkene til Michael Morpurgo frå engelsk, barnebøkene til Ulf Nilsson frå svensk og Janosch frå tysk.
Han har òg omsett bøker for vaksne, mellom anna romanane Laura Palmers hemmelige dagbok (1991) av Jennifer Lynch og Bittert favntak (1991) av Carrie Fischer frå engelsk og dokumentaren Sex under Hitler (2009) av Anna Maria Sigmund frå tysk.
Rosse har fått Kulturdepartementets omsetjarpris for barnelitteratur i 1984, 1987, 1990 og 2003 for omsetjingar av svenske Max Lundgren, engelske Michael Page, kanadiske Welwyn Wilton Katz og danske Lene Kaaberbøl til nynorsk. Han fekk Bastianprisen i 2002.
Kjelder
SMS frå Øystein Rosse 6.11.2011
Norsk oversetterforening, oversikt over Rosse sine omsetjingar, http://www.oversetterforeningen.no/medlem/client.php?s=1&do=getProduction&medl_nr=199 [lesedato 5.11.2011]
Øystein Rosse, forfattarside, Foreningen !les, publisert 2.12.2010, http://www.txt.no/index.php?option=com_content&view=article&id=1042:dagens-oversetter-oystein-rosse&catid=135:2010&Itemid=100049 [lesedato 18.10.2011]
Peikarar

Først publisert: 29.02.2012
Sist oppdatert: 18.03.2013