Faktaboks

Anne-Grete Strøm-Erichsen
Fødd
21. oktober 1949, Bergen
Verke
Ingeniør og politiker
Familie

Foreldre: Jurist Leon Hjelle (1926–1998) og kontordame Irene Johannessen (1927–2009).

Gift 31.7.1971 med sivilingeniør Arve Strøm-Erichsen (11.3.1947–), sønn av Finn Strøm-Erichsen og Sigrid Juel Jensen.

Anne-Grete Strøm-Erichsen

Anne-Grete Strøm-Erichsen var forsvarsminister frå 2005 til 2009 og 2012 til 2013, og helse- og omsorgsminister frå 2009 til 2012. Foto frå 2009.

Anne-Grete Strøm-Erichsen er ein norsk dataingeniør og politikar. I Stoltenberg si andre regjering var ho både forsvarsminister og helse- og omsorgsminister.

Bakgrunn

Anne-Grete Strøm-Erichsen er fødd i Bergen. Ho tok examen artium, reallinja, ved Langhaugen gymnas i 1968. I 1974 blei ho uteksaminert som EDB-ingeniør frå Bergen ingeniørhøgskole (no Høgskolen i Bergen), og ho studerte ved South Dakota School of Mines & Technology i 1980–1981.

Strøm-Erichsen var operatør ved EDB-avdelinga ved Universitetet i Bergen i 1974–1977, programmerar ved Nordisk institutt same staden i 1977–1984, systemkonsulent og systemsjef ved GPI AS i 1984–1987, dagleg leiar i Talesystemer AS i 1987–1988, seniorkonsulent i Siemens Nixdorf i 1988–1991 og i BDC AS i 1991–1995. Frå 1995 til 2013 var ho heiltidspolitikar. I 2014 blei ho partnar og rådgivar i det nordiske rådgivingsselskapet Rud Pedersen.

Politisk karriere

Lokalpolitikar i Bergen

Frå 1991 var Strøm-Erichsen medlem av formannskapet og bystyret i Bergen, og frå 1995 til 1998 kommunalråd for skule, inntil ho tok over som varaordførar i 1998. Etter valet i 1999 blei ho den første kvinnelege ordføraren i Bergen (1999–2000), og då Bergen innførte byparlamentarisme i 2000, blei ho den første byrådsleiaren (2000–2003). I hennar tid som byrådsleiar blei Bybanen i Bergen vedteken, tenkt som ryggrada i kollektivsystemet i byen. Ho var leiar for Arbeidarpartiet i Hordaland i 1998–2000 og var medlem av sentralstyret i partiet i 2002–07. Ho var også medlem i bystyret i Bergen 2003–2005.

Rikspolitikar

Frå 2005 til 2013 var ho vald inn på Stortinget for Arbeidarpartiet i Hordaland, men var heile perioden statsråd for Arbeidarpartiet i koalisjonsregjeringa av Arbeidarpartiet, Sosialistisk Venstreparti og Senterpartiet. Ho var forsvarsminister i 2005–2009, helse- og omsorgsminister i 2009–2012 og forsvarsminister att 2012–2013.

Som politikar har Anne-Grete Strøm-Erichsen vore oppteken av sosial rettferd og sterk offentleg satsing på skule og helse. Då ho var forsvarsminister, var den norske innsatsen i Afghanistan stadig eit utfordrande tema. I stillinga som helseminister la ho vekt på arbeidet med kvalitet i helsetenestene, pasienttryggleik og bruk av IKT i helsevesenet.

Andre verv

Strøm-Erichsen har vore leiar av styret for Bergen Lysverker i 1995–1997, Kulturby Bergen i 1998–2000 og Vest-Norges Brussel-kontor i 2002–2004. Ho var leiar for den offentlege utgreiinga Energi- og kraftbalansen mot 2020 i 1997–1998 og har vore medlem i styret for Kommunenes Sentralforbund i 2004–2005. I 1999–2001 var ho president i Organization of World Heritage Cities, og ho var medlem i Europarådet i 2004–2005. Frå 2020 er ho styreleiar i Tankesmien Agenda.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg