Faktaboks

Edvard Storm
Fødd
21. august 1749, Vågå, Innlandet
Død
29. september 1794, København, Danmark
Verke
Forfattar og skolemann
Familie

Foreldre: Sokneprest Johan Storm (1712–76) og Ingeborg Birgitte Røring (1718–60).

Ugift.

Fetter til Edvard Colbjørnsen (1744–1802), Christian Colbjørnsen (1749–1814), Edvard Røring Colbjørnsen (1751–92; sjå NBL1, bd. 3) og Peter Olivarius Bugge (1764–1849); onkel (mors halvbror) og filleonkel (fars fetter) til Johan Storm Munch (1778–1832); grandonkel (farmors bror) til Ole Bull (1810–80), Knud Bull (1811–89), Georg Andreas Bull (1829–1917) og (farmors halvbror) til Peter Andreas Munch (1810–63) og Andreas Munch (1811–84).

Edvard Storm

Edvard Storm. Bilde frå Norsk biografisk leksikon.

Edvard Storm
Av /Kunnskapsforlaget/NTB Scanpix ※.

Edvard Storm var ein norsk diktar, språksamlar og skulereformator. Han bidrog til å skape det nynorske skriftspråket – og den danske folkeskulen.

Edvard Storm var fødd i Vågå i Gudbrandsdalen. Han var elev ved katedralskulen i Oslo i 1761–1765, tok examen artium i København i 1765 og byrja på teologistudiet der i 1769. Bortsett frå tre år i Gudbrandsdalen (1766–1769) budde i København i heile sitt vaksne liv.

Storm fullførte ikkje teologistudiet, men brukte tid på dikting og ordsamling. Han kartla målet i Vågå-traktene og noterte 1500 oppslagsord derifrå. Samlinga vart publisert første gongen i Ord i den Guldbrandsdalske Dialect (2009). I byrjinga av 1770-åra skreiv han eit titals songar, av dei «Heimreise fraa Sæteren» (Oss ha gjort qva gjæras skulle), på gudbrandsdalsmål. Songane vart gitt ut som Døleviser i 1802 og kom med i Jørgen Moe si folkevisebok i 1840. I 1949 kom ei ny utgåve av Døleviser ved Didrik Arup Seip. I 1785 gav Storm ut sine Samlede Digte (utan dølevisene).

Med dikting på dialekt braut han med det danske språkmonopolet på 1700-talet. Nyskapinga skulle vise seg å vere liv laga, for nokre tiår seinare utforma Ivar Aasen ei felles skriftform for alle dialektar, landsmålet. Sjølv gjekk Storm over til å skrive dansk.

Frå 1780-åra er det skulereformatoren Storm som gjer seg gjeldande. Han var med på å stifte «Selskabet for Efterslægten» i 1786, som starta ein realskule bygd på nye pedagogiske prinsipp. Pugging og pryl vart reinska ut. Ungdomen skulle undervisast i allmenne fag og praktiske kunnskapar, og Storm førelas om livsklokskap og nordisk mytologi. «Selskabet for Efterslægten» sitt brot med den autoritære, kyrkjestyrte skulen bana veg for den moderne folkeskulen i Danmark, og «Efterslægten» driv framleis skule i København.

Les meir i Store norske leksikon

Eksterne lenker

Litteratur

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg