Hopp til innhold
X
Innhald

Gaute M. Sortland

Gaute M. Sortland er forfattar og musikar. Med eit knapt og treffande språk gir han eit finurleg perspektiv på kvardagslivet.

Gaute Mikal Sortland er fødd 25. januar 1980 i Haugesund. Han har mastergrad i nordisk litteraturvitskap frå Universitetet i Oslo i 2007. Sortland er både låtskrivar, gitarist og vokalist i Bergen Mandolinband. Bandet kombinerer nynorske tekstar med amerikansk folkemusikk. Debutplata, Lang veg til Tysvær, kom ut i 2008.

Som forfattar tematiserer han ofte den skjøre grensegangen mellom liv og død. Tekstane er prega av ei stadig veksling mellom det snodige og lune og det alvorlege og melankolske. Språket er knapt, konsentrert og presist. Ein underfundig stil kjenneteiknar forfattarskapen, noko som skapar stemning i tekstane og gir dei både humor og djupn.

Sortland debuterte med ungdomsromanen Johan i 2009. Gjennom parallellhistorier frå fortid og notid vert vi kjende med den unge Johan som har mist veslesyster si i ei dødsulukke. Minne og skuldkjensle nagar ungguten, og dei vaksne har ikkje gitt han høve til å snakke ut om sorga.

Sortland har gitt ut fleire kortprosasamlingar. Du er her igjen og alt er forandra (2011) inneheld forteljingar frå eit heilt år, og med eit mangfald av karakterar. Forfattaren skaper litterære bilete av korte, avgjerande situasjonar i ulike menneskeliv. Fotturar i Norge (2015) er dikt og forteljingar med kvardagsmotiv som tek for seg menneskelege relasjonar, medan Korte meisterverk (2017) er korttekstar som med varme og truverd sirklar rundt døden og livet.

Kjelder

E‑post frå Gaute M. Sortland 15.11.2017

«Gaute M. Sortland», forfattarside hos Samlaget, samlaget.no: https://samlaget.no/collections/gaute-m-sortland [lesedato 14.11.2017]

Peikarar

Heidi Berg Bentele: «Sommersnakk med Gaute M. Sortland», Deichmans litteraturblogg, deichman.no 

Bjørn Veen: «The rise and fall of Gøran Trovåg av Gaute M. Sortland», blogginnlegg på ungdomsboka.blogspot.no 

Først publisert: 07.03.2018
Sist oppdatert: 07.03.2018