Hege Storhaug

Hege Storhaug er fødd i Arendal. I unge år var ho landslagsspelar i volleyball, og ho utdanna seg til faglærar i idrett ved Norges idrettshøgskole i 1987. Seinare gjekk ho over til journalistikken og tok eksamen ved Norsk journalisthøgskole i 1992.

Frå 1992 til 2002 arbeidde ho som frilansjournalist og var tidleg ute med å setje søkelyset på tvangsekteskap, kjønnslemlesting og andre overgrep mot innvandrarjenter i konservative muslimske miljø. Den sterke engasjementet hennar fekk mellom anna næring av erfaringar frå eit to år langt opphald i Pakistan i 1990-åra. I 2001 var ho del av TV2-teamet som fekk prisen Gullruten for beste dokumentar for ein serie som avslørte at imamar i Oslo støtta kjønnslemlesting.

I 2002 vart Storhaug informasjonsleiar for tenketanken Human Rights Service. Her har ho halde fram som ein skarp kritikar av islamisme og konservativ islam frå eit kvinneperspektiv. Det har i fleire år vore strid om statsstøtta til Human Rights Service.

I kjølvatnet av den store bølgja av asylsøkjarar til Europa hausten 2015 gav Storhaug ut debattboka Islam. Den 11. landeplage. Boka vart ein bestseljar. Forfattaren vart likevel kritisert for å vere unyansert og ikkje skilje mellom islam som religion og den politiske islamismen.

Storhaug er tøff i ordbruk og metodar, og det har ført til at enkelte tidlegare støttespelarar har vendt seg frå henne. Storhaug trekte sjølv tilbake ein påstand om at Erna Solberg dreiv «kultursvik mot nasjonen» då statsministeren besøkte ein moské i 2015.

• Når følelser blir mat – kvinner og spiseforstyrrelser (saman med Karin Christensen), 1990, Aschehoug forlag
• Kvinner, idrett og spiseforstyrrelser, 1990, Interessegruppa for kvinner med spiseforstyrrelser
• Mashallah – en reise blant pakistanske kvinner, 1996, Aschehoug forlag
• Hellig tvang. Unge norske muslimer om kjærlighet og ekteskap, 1998, Aschehoug forlag
• Tvangsekteskap og æresdrap i det muslimske miljøet i Norge (saman med Tonje Steinsland), SKUP-rapport
• Tvangsekteskap . En kriseguide, 2001, Selvhjelp for innvandrere og flyktninger (hefte)
• Omskjæring : en guide mot kjønnslemlestelse, 2001, Selvhjelp for innvandrere og flyktninger (hefte)
• Feminin integrering. Utfordringer i et fleretnisk samfunn, 2003, Human Rights Service
• Et fleretnisk Norge. Utfordringer som krever handling, 2003, Human Rights Service (rapport)
• Men størst av alt er friheten. Om innvandringens konsekvenser, 2006, Kagge Forlag
• Tilslørt. Avslørt. Et oppgjør med norsk naivisme, 2007, Kagge Forlag
• Jeg er Mia (sammen med Mia Gundersen), 2008, Aschehoug forlag
• Rundlurt. Om innvandring og islam i Norge, 2009, Kagge Forlag
• Islam, den 11. landeplage, 2015, Kolofon forlag

• Human Rights Service