Faktaboks

Jahn-Arill Skogholt
Fødd
30. desember 1943, Storfjell i Vågan i Lofoten
Død
19. april 2007, Lofoten

Jahn-Arill Skogholt var ein lærar, lokalpolitikar og forfattar som fekk gjennombrotet sitt med visa «Kor e hammaren, Edvard?», som også blei eit varemerke for den nordnorske visebølgja i 1970-åra.

Biografi

Skogholt arbeidde som lærar i Lofoten eit par år etter realskole og gymnas, før han tok til med høgare utdanning i Bergen og Oslo. Som cand.mag. med faga statsvitskap, offentleg rett og offentleg administrasjon fekk han jobb som skrivar i Noregs Mållag (1971–1973). Etter åra som skrivar arbeidde han igjen som lærar i Lofoten, fram til han byrja som kultursekretær i Vestvågøy (1977–1985). Etter dette gjekk han tilbake til læraryrket, som adjunkt ved Vestvågøy videregående skole. Praktisk-pedagogisk seminar tok han ved Universitetet i Tromsø i 1989. I åra som adjunkt var han òg frilansar for avisa Lofot-Tidende.

Utgivingar

Skogholt gav ut ei diktsamling og to romanar, I havherrens land (roman, 1987) og Grågud og kvitekrist (roman, 1999). Den sistnemnde boka er tilgjengeleg gratis på Internett. I tillegg hadde han noveller på trykk i ei lang rekkje antologiar. I 1971 vann han Dag og Tid sin visekonkurranse med «Bygdevise». Visa blei tonesett av Jack Berntsen og kom seinare ut i samlinga Kor e hammaren, Edvard? (viser og songar, 1977). Saman med Andreas Hompland skreiv han Ein målsstrid i Bygde-Norge (sakprosa, 1974), og i 1993 kom Lofotfiskar ved Kongens bord (biografi, 1993), om tidlegare fiskeriminister Eivind Bolle.

Verv

Skogholt var styreleiar i Nordnorsk Kulturråd (1989–2001), hadde styre- og leiarverv i Nordnorsk Forfatterlag og var aktiv for SV i lokalpolitikken.

Prisar

I 1987 fekk han Blixprisen, som litteraturselskapet Det Norske Samlaget deler ut «til ein framifrå nordnorsk forfattar som skriv nynorsk».

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg