Faktaboks

Karin Sveen
Solvår Karin Sveen
Fødd
17. august 1948, Hamar, Innlandet
Karin Sveen
Karin Sveen
Av .

Karin Sveen er adjunkt og ein prislønt forfattar og spaltist i fleire aviser. Ho har særleg sett spor etter seg som essayist.

Bakgrunn

Solvår Karin Sveen er fødd i Hamar i Oppland (no Innlandet). Ho gjekk på Hamar Katedralskole på slutten av 1960-åra og er utdanna adjunkt med 2-årig lærarskule på Hamar og seinare nordisk ved Universitetet i Oslo. Ho arbeidde som lærar ved Brumunddal ungdomsskole i 1975–1979 og har vore forfattar på heiltid sidan 1980. I 2004–2005 var ho visiting scholar ved universitetet i Berkeley, California.

Forfattarskapen

Sveen debuterte i 1975 med diktsamlinga Vinterhagen. Seinare har ho mellom anna gitt ut diktsamlingane Kroppens sug, hjertets savn (1985) og Nye dikt (1996). Sveen har gitt ut ei novellesamling og fleire romanar. Ho har òg skrive manuset til filmane Snart 17 (1984) og Da Hanna ikke ville flytte. Sveen bruker begge målformer.

Sveen er ein av del sentrale norske essayistane i samtida og har ein skrivemåte som gjer at ho formulerer vanskelege emne tydeleg og presist, med eit spenstig, presist og medvite språk. Essaya hennar skaper refleksjon og undring gjennom å overraske, utfordre og stimulere lesaren.

Essaysamlinga Den kultiverte lidelse. En bok om kropp og samfunn blei utgitt i 1997, og i 2000 kom den andre essaysamlinga, Klassereise. Denne andre boka la grunnlaget for diskusjonen om klassereiser i det norske samfunnet dei siste tiåra – noko Sveen sjølv har erfaring med. Det var svenske bøker om «klassresan» i 1990-åra som låg under den debatten som først starta i Sverige og seinare kom til Noreg. Frokost med fremmede (2005), som Sveen skreiv under opphaldet ved Berkeley, fekk svært gode kritikkar. I 2011 gav ho ut Mannen i Montgomery Street. Portrett av en norsk emigrant – om bondesonen Peter Sæther som emigrerte til Amerika, blei ein av dei rikaste mennene i California, og som donerte mykje pengar i samband med stiftinga av universitetet i Berkeley.

Anna engasjement

I ein periode i 1970-åra sat ho som kommunestyrerepresentant for Sosialistisk Venstreparti i Hamar, og ho har vore medlem av Norsk kulturråds essayutval, styret i Den norske Forfatterforening og var leiar og nestleiar i Det litterære råd i Forfatterforeninga i ei årrekkje.

Utmerkingar

Karin Sveen fekk De norske Bokklubbenes lyrikkpris og Hartvig Kirans minnepris i 1978, Sarpsborgprisen i 1980, Cappelenprisen i 1984 og Språklig samlings litteraturpris i 1986. Ho fekk Klassekampens kulturpris i 2005 og Norsk språkpris i 2007 for framifrå bruk av norsk i sakprosa. Den kultiverte lidelse er mellom anna omsett til svensk, Frokost med fremmede til engelsk, og Klassereise blei i 2018 kåra til ei av dei 25 viktigaste norske sakprosabøkene etter andre verdskrigen.

Bibliografi

  • Mannen i Montgomery Street (Roman, Oktober, 2011)
  • Frokost med fremmede (Essays, Oktober, 2005)
  • Klassereise – et livshistorisk essay (Essays, Oktober, 2000)
  • Det tålmodige landskapet. (Lyrikk, Ord & Jord, 1998)
  • Den kultiverte lidelse. (Essays, Oktober, 1997)
  • Nye dikt. (Lyrikk, Oktober, 1996)
  • Maria Waters verden. (Roman, Pax, 1993)
  • Hannas hus. (Roman, Pax, 1991)
  • Tegnebok. (Lyrikk, Pax, 1989)
  • Kvinnen som forsvant. (Roman, Pax, 1987)
  • Kroppens sug, hjertets savn. (Lyrikk, Pax, 1985)
  • Den reddende engelen. (Roman, Pax, 1984)
  • Utbryterdronninga. (Roman, Pax, 1982)
  • Døtre. (Noveller, 1980)
  • Den svarte hane. (Lyrikk, Cappelen, 1977)
  • Mjøsa går. (Lyrikk, Cappelen, 1976)
  • Vinterhagen. (Dramatikk, Cappelen, 1975)

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg