Faktaboks

Karl Eirik Schjøtt-Pedersen
Fødd
3. oktober 1959, Vardø, Troms og Finnmark
Karl Eirik Schjøtt-Pedersen
/Norsk olje og gass.
Lisens: CC BY 2.0

Karl Eirik Schjøtt-Pedersen er ein norsk politikar for Arbeidarpartiet og tidlegare statsråd, som sidan 2022 er riksrevisor.

Han var stortingsrepresentant frå 1985 til 2009 og har vore statsråd i både Jagland-regjeringa og Stoltenberg I- og Stoltenberg II-regjeringa. Frå 2015 til 2020 var han administrerande direktør i interesse- og arbeidsgivarorganisasjonen Norsk olje og gass.

Bakgrunn

Karl Eirik Schjøtt-Pedersen er fødd i Vardø. Han er utdanna cand.mag., med faga statsvitskap, sosialøkonomi og offentleg rett ved Universitetet i Oslo (1985).

Politisk karriere

Ungdoms- og lokalpolitikk

Schjøtt-Pedersen var medlem av styret i Vardø Arbeidarparti i 1979–1980, medlem av styret for Finnmark AUF i 1980–1985 og medlem av sentralstyret i AUF i 1985–1989. I 1979–1985 var han medlem av kommunestyret i Vardø.

Stortingsrepresentant og minister

Han blei vald inn på Stortinget for Arbeidarpartiet i Finnmark som vararepresentant i 1981 og som fast representant frå i 1985 og sat som stortingsrepresentant fram til 2009.

Den første ministerposten hadde Schjøtt-Pedersen i 1996–1997, som fiskeriminister i regjeringa til Thorbjørn Jagland. I den første regjeringa til Jens Stoltenberg, i 2000–2001, var han finansminister. Han var statssekretær og stabssjef ved Statsministerens kontor i 2006–2009 i Stoltenbergs andre regjering og var statsråd same staden 2009–2013. Han vart då gjerne kalla samordningsminister, men utan å ha eit eige ansvarsområde.

På Stortinget har han mellom anna vore leiar i finanskomiteen (1993–1996 og 2005–2006). Frå 1990-åra og fram til Stoltenbergs koalisjonsregjering gjekk av var han ein av dei sentrale politikarane i Arbeidarpartiet. I 2005–2006 var han parlamentarisk nestleiar. Schjøtt-Pedersen har ei brei politisk orientering, men har særleg arbeidd med finans-, nærings- og distriktspolitikk.

Verv

Schjøtt-Pedersen har vore medlem av ei rekkje politiske utval i Arbeidarpartiet, mellom anna Arbeidarpartiets næringsutval i 1985–1987 og økonomisk-politiske utval i 1989–1994. Han var leiar for Arbeidarpartiets Nord-Noreg-utval i 1992–1993 og i kystutvalet i 2004–2005.

Han var medlem i styret for Vardø sjukehus i 1981–1985 og leiar for Europabevegelsens distriktspolitiske utval i 1989–1990. Frå 2014 til 2018 var han nestleiar i Riksrevisjonen.

Sidan 2015 har han vore styreleiar i SpareBank 1 Nord-Norge.

Andre stillingar

Frå 2015 til 2020 var Karl Eirik Schjøtt-Pedersen tilsett som administrerande direktør i interesse- og arbeidsgivarorganisasjonen Norsk olje og gass. Frå 2020 til 2021 var han partnar i konsulentselskapet Menon Economics, og i 2022 blei han Per-Kristian Foss' etterfylgjar som riksrevisor.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg