Faktaboks

Ketil Solvik-Olsen
Fødd
14. februar 1972, Bryne, Rogaland
/Samferdselsdepartementet.

Ketil Solvik-Olsen er ein norsk politikar frå Framstegspartiet (FrP) og tidlegare stortingsrepresentant for Rogaland frå 2005 til 2013. Han var samferdselsminister i regjeringa Erna Solberg frå 2013 til 2018 og nestleiar i Framstegspartiet frå 2013 til 2019 og sidan 2021.

Bakgrunn

Ketil Solvik-Olsen er fødd i Time i Rogaland. Han gjekk på Bryne vidaregåande skule i 1988–1989, var utvekslingselev i Michigan, USA i 1989–1990 og tok IB-linja (International Baccalaureate) ved St. Olav videregående skole i Stavanger i 1990–1992. Han fullførte bachelorgrada si i samfunnsøkonomi og statsvitskap ved University of Toledo i Ohio, USA i 1994–1996 og tok mastergrad i samfunnsøkonomi same staden i 1997. Solvik-Olsen var finansanalytikar ved reiarlaget Leif Höegh & Co i 1997–1998, deretter som prosjektleiar ved Møller US Import AS i 1998–2000 og prosjektleiar hos Leif Höegh & Co i 2000–2001.

Politisk karriere

Verv i FpU og FrP

Han blei aktiv i Framstegspartiets Ungdom (FpU) i 1988–1992 som styremedlem i Time FpU, Jæren FpU og Rogaland FpU. Han var formann i Helsfyr Sinsen Frp i 2002, kassastyrar i Oslo Frp i 2002–2004 og leiar i 2004–2005. Han var vararepresentant i Oslo bystyre i 2003–2005, varamedlem av Frps sentralstyre i 2005–2006 og blei 2. nestleiar i partiet i 2013.

Storting og regjering

Solvik-Olsen var spesialrådgivar for stortingsgruppa til Framstegspartiet i 2001–2005. For periodane 2005–2013 var han stortingsrepresentant for Framstegspartiet frå Rogaland. Som stortingsrepresentant frå 2005 engasjerte Solvik-Olsen seg for det meste i energi- og finanspolitikk. I åra 2005–2011 var han medlem av Stortingets energi- og miljøkomité. Frå 2011 blei han finanspolitisk talsmann for Framstegspartiet, og frå 2011 til 2013 var han første nestleiar i finanskomiteen på Stortinget.

Solvik-Olsen var samferdselsminister i regjeringa Solberg frå 2013 til han flytta til USA i 2018. Av familiære omsyn ønskte ikkje Solvik-Olsen å bli renominert og attvalt som stortingsrepresentant i 2013. Han gjekk òg av som statsråd i 2018 av private grunnar. Etter eit utanlandsopphald kom han tilbake i politikken og vart igjen valt som nestleiar i 2021 under den nye partileiaren Sylvi Listhaug.

Solvik-Olsen var ein av dåverande partileiar Siv Jensen sine næraste og mest fortrulege støttespelarar. Han blir rekna som ein av dei mest kunnskapsrike og debattsterke i partiet, med legning for ideologisk tenking. Solvik-Olsen er både avhaldmann og nært knytt til pinserørsla. Solvik-Olsen arbeider òg for meir ressursar til politi og helseføretak, betre vilkår for industrien og for å redusere bompengefinansieringa.

Solvik-Olsen har vore miljøpolitisk talsmann for Framstegspartiet og kritisk til at miljøproblema er menneskeskapte, men har kome med forslag om å forske på kjernekraft og meir vasskraftutbygging for å få ned utsleppa. Han melde seg ut av statskyrkja i 2010 i protest mot at leiande personar i Kyrkja stod fram og åtvara mot oljeverksemd utanfor Lofoten, Vesterålen og Senja.

Utgjevingar

Solvik-Olsen har gitt ut boka På vei (2019).

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg