Faktaboks

Nils Nilsson Skaar
Fødd
28. mars 1852, Kvam, Vestland
Død
12. juni 1948, Kvam, Vestland
Nils Nilsson Skaar, cirka 1916
Nils Nilsson Skaar, cirka 1916
Av /𝒲.

Nils Nilsson Skaar var avisredaktør og lokal- og rikspolitikar frå Hardanger. Han dreiv avisa Hordaland Folkeblad gjennom meir enn ein menneskealder og sat som stortingsrepresentant mest like lenge.

Skaar vart fødd i Fyksesundet i Kvam i Vestland. Han var son til Nils Nilsen Skaar, som var engasjert i politisk arbeid gjennom mange tiår. I likskap med faren vart også Skaar politikar og ein synleg og engasjert innbyggjar i lokalmiljøet.

Skaar fekk utdanning ved Voss lærarskule 1866–1868, Stord seminar 1869–1870 og Christoffer Bruun sin folkehøgskule i Gausdal 1872. Han verka som lærar ved ulike folkehøgskular 1872–1885. I 1878 overtok han som redaktør og sidan som eigar av avisa Hardangeren, som han døypte om til Søndre Bergenhus Folkeblad og seinare Hordaland Folkeblad. Frå 1882 budde han i Norheimsund, der avisa kom ut. Skaar skreiv ikkje berre om lokale saker. Han kommenterte stadig rikspolitikken og vart lesen i vide krinsar, også i hovudstaden.

Stortinget sat Skaar som representant frå Hordaland (Søndre Bergenhus) for Venstre 1886–1888, Det moderate Venstre i 1889–1894 og Venstre 1910–1924. Han var medlem av kommunestyret i Kvam (Vikør) 1886–1919 og var ordførar 1888–1919. I tillegg hadde han ei rekkje andre offentlege og private verv, mellom anna som formann i Kvams venstreforening og Hordaland Mållag. Frå 1925 til 1936 var han redaktør for Hardanger historielag sitt tidsskrift.

Les meir i Store norske leksikon

Litteratur

  • Lars Ek: Stortingsmann Nils Skaar. En moderat venstremanns politiske utvikling i årene 1885-1894. Hovudoppgåve i historie ved Universitetet i Oslo. 1965
  • Nils Kolle: Bygdebok for Kvam bind II. Liv og lagnad på 1800-talet. Kvam 1999
  • Vilhelm Haffner: Stortinget og statsrådet : 1915-1945, band 1: Biografier. Oslo 1949

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg