Faktaboks

Sigmund Sæverud
Fødd
3. mars 1939, Bergen
Sigmund Sæverud saman med Per Schaanning (til høgre) i forestillinga Røff (2017) på Det Norske Teatret.
.

Sigmund Sæverud er ein norsk skodespelar og regissør. Han var med og skipa Hålogaland Teater i Tromsø og var i mange år mellom dei sentrale skodespelarane ved teatret.

Bakgrunn

Sigmund Sæverud er fødd i Bergen. Han vart uteksaminert frå Statens Teaterhøgskole i 1964 og var tilsett ved Den Nationale Scene i Bergen i 1967–1971. Sæverud var med og skipa Hålogaland Teater i Tromsø i 1971 og var knytt til teatret fram til i 2006. Sidan har han vore frilansar.

Sæverud har skrive skodespel for born, mellom anna eventyrframsyninga Gutten og gullfuglen (1970 og 1977).

I 2014 mottok han Heddaprisen i klassa for beste mannlege medspelar for rolla som Lucky i Mens vi ventar på Godot, som vart produsert av Riksteatret og Det Norske Teatret.

Teaterroller

Sæverud var ein av dei sentrale skodespelarane ved Hålogaland Teater frå byrjinga og tok del i alle dei viktige produksjonane i den første tida ved teatret, mellom anna i det store gjennombrotet, Det e her æ høre tel (1973). Han har hatt roller som Winston i Athol Fugard Øya (1985), Goldberg i Harold Pinters Fødelsdagsselskapet (1986) og Stivhatten i jubileumsframsyninga Kranes Konditori av Cora Sandel (1986). Han har òg vore regissør for fleire framsyningar, mellom anna suksessen Den tapre soldat Svejk av Jaroslav Hašek (1985).

I 1995 gjesta han Den Nationale Scene i Helligtrekongersaften eller Hva de vil, og han medverka i Pierre Schaeffers Amadeus ved Oslo Nye Teater i 2001 og i Hamlet ved Teater Ibsen i 2005.

Av Henrik Ibsen har han blant anna spela Brack i Hedda Gabler (Hålogaland Teater 1987), Dovregubben og andre roller i Peer Gynt (Den Nationale Scene 1993), grosserar Werle i Vildanden (Hålogaland Teater 2001, og igjen på Teater Ibsen i 2009).

Film- og fjernsynsroller

Sigmund Sæverud har vore med i fleire filmar og fjernsynsproduksjonar, mellom anna i Nattseilere (1988), Solens sønn og månens datter (1993), Gåten Knut Hamsun (1996) og Jeg er Dina (2002). I den populære NRK-serien Himmelblå (2008–2010) frå Ylvingen på Helgeland spela han gardbrukaren Johan.

Sæverud er på sitt beste når han framstiller karakterar frå nordnorske miljø. I tillegg til å vere skodespelar, har han undervist ved Statens Teaterhøgskole.

Les meir i Store norske leksikon

Eksterne lenker

Litteratur

  • Jens Harald Eilertsen: Polare scener. Nordnorsk teaterhistorie fra 1971–2000. Stamsund 2005

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg