Hopp til innhold
Sigrun Slapgard. Foto: Tove K. Breistein, Det Norske Samlaget. Nytta etter avtale med forlaget.
Sigrun Slapgard. Foto: Tove K. Breistein, Det Norske Samlaget. Nytta etter avtale med forlaget.
X
Innhald

Sigrun Slapgard

Sigrun Slapgard, journalist og forfattar med interesse for krigstematikk. Ho er òg oppteken av kvinner i norsk presse- og litteraturhistorie.

Sigrun Slapgard er fødd i Hemsedal 30. oktober 1953 og voks opp i Gudbrandsdalen. Ho vart cand.mag. ved Universitetet i Oslo i 1980 med fagkrinsen spansk, sosiologi og allmenn litteraturkunnskap. I perioden 1977–1981 arbeidde ho som frilansjournalist. Ho vart tilsett i NRK i 1988, der ho arbeider som journalist og utanriksmedarbeidar. Ho har vore programleiar i Redaksjon 21 og Utanriksmagasinet, og har redigert TV-dokumentarar frå mellom anna krigssoner i Midtausten. Slapgard nyttar begge målformer.
Reportasjeboka Draumar i krysseld frå 1989 er eit samarbeidsprosjekt med fotograf Aslak Aarhus, der bilete og tekst går opp i ein høgare syntese. Som forarbeid for boka tråla dei rundt i Mellom-Amerika og det sørlege Afrika. Temaet i boka er menneskelagnader under ekstreme livsforhold. Slapgard fekk Melsom-prisen for biografien Krigens penn (2002) om Lise Lindbæk, arkeologen som gjorde krigsjournalistikk til si livsoppgåve og motarbeidde fascismen i Spania. Året etter gav Slapgard ut Krig og løgn, der ho tek opp presseetiske problemstillingar knytte til mediedekninga av Irak-krigen. I 2007 kom biografien Sigrid Undset. Dikterdronningen.
Kjelder
Reidun Kvaale: Kvinner i norsk presse gjennom 150 år. Oslo 1986
Sigrun Slapgard og Aslak Aarhus: Draumar i krysseld. 1989
Sigrun Slapgard: Krigens penn. Oslo 2002
Sigrun Slapgard: Krig og løgn. Oslo 2003
Sigrun Slapgard: Sigrid Undset. Dikterdronningen. Oslo 2007
Nils E. Øy (red.): Pressefolk 1997, 7.utgåve, Institutt for Journalistikk 1998
Peikarar

Først publisert: 06.07.2012
Sist oppdatert: 17.04.2018